Aldo Koppola hayot yo‘li

Aldo Koppola 1940-yil 14-fevralda tug‘ilgan. Uning otasi sartarosh bo‘lgan va Aldo bu san’atni meros qilib oldi. Biroq, u shunchaki oilaviy kasbni davom ettirish bilan cheklanmay, haqiqiy yangilik yaratuvchisiga aylandi. Uning dahosi go‘zallik va moda olamini butunlay o‘zgartirib yubordi.

16 yoshida Aldo allaqachon san’at bo‘yicha diplom sohibi edi. 26 yoshida esa Milandagi Via Manzoni ko‘chasining 14-uyida o‘zining birinchi salonini ochdi. U boshidanoq sartaroshlik san’atiga yanada tabiiyroq va harakatchan yondashuvni taklif qilib, eskirgan qoliplarni buzishga intildi. U statsionar soch quritgich va bigudilarga barham berib, birinchi bo‘lib sochlarni quruq holda qirqish va fen hamda cho‘tka yordamida turmaklashni boshladi. Ushbu yangiliklar, jumladan, kaskadli qirqish usuli va tabiiy jingalak beradigan doimiy turmaklash texnikasini yaratish Aldo Coppola salonlarining o‘ziga xos uslubini shakllantirdi. Aynan Milan jahon moda poytaxtiga aylanayotgan davrda Aldoning innovatsion g‘oyalari yangicha jarang kasb etdi.

suratni Aldo Coppola matbuot xizmati taqdim etgan

Moda olamiga chuqurroq kirib borgan Aldo Pittidagi namoyish uchun mashhur dizayner Biki bilan hamkorlik qila boshladi. Bu tajriba unga yetakchi moda uylarining eshiklarini ochdi va ko‘p o‘tmay u Italiyaning eng taniqli dizaynerlari va nufuzli moda jurnallari bilan ishlashni boshladi.

1973-yilda u birinchi rasmiy Coppola brendini tashkil etib, sartaroshlik san’atida yangi davrni boshlab berdi. Uning avant-gard uslubi Jorjio Armani, Versache, Janfranko Ferre, Valentino va Mila Shon kabi afsonaviy dizaynerlarning ajralmas qismiga aylandi. Uning nomi tez orada sartaroshlik san’atidagi eng yuksak mahorat va ijodkorlik timsoli sifatida tan olindi.

suratni Aldo Coppola matbuot xizmati taqdim etgan

Brend rivojlanishidagi muhim bosqich uning o‘g‘li Aldo Koppola-kichikning L’Oréal bilan hamkorlik o‘rnatishi bilan boshlandi. Bu esa kompaniyaning ta’sir doirasini kengaytirish imkonini berdi. Mazkur hamkorlik biznes doirasidan tashqariga chiqib, mashhur san’at kitoblari, ramziy taqvimlar va 10 000 gacha tomoshabinni to‘playdigan ulkan shou dasturlarini yaratdi. Aldoning jo‘shqinligi va uning badiiy tasavvuri tomoshabinlarni maftun etib, uning sanoat ustasi maqomini mustahkamladi.

Aldo ijod qilishda davom etar ekan, uning o‘g‘li Aldo Koppola-kichik brendni yangi bosqichga olib chiqdi. U moda va media loyihalari uchun sartaroshlik hamda pardoz bo‘yicha Italiyadagi birinchi ko‘p darajali mustaqil mutaxassislar agentligi – The Agency’ni tashkil etdi. Bundan tashqari, u o‘zining soch parvarish vositalari va aksessuarlari turkumini ishga tushirdi, shuningdek, Aldo Coppola brendi butun Italiya bo‘ylab kengayishiga imkon bergan franchayzing modelini joriy etdi. Biznesning rivojlanishiga qaramay, ijodiy rahbarlik doimo Aldo Koppolaning qo‘lida bo‘lib, bu firma uslubi va eng yuqori sifat me’yorlarini saqlab qolishni ta’minladi.

1990-yillarda Aldo Coppola salonlari tarmog‘i misli ko‘rilmagan tezlikda kengaydi. Aldoning noyob texnikasiga talab ortib bordi va butun dunyodagi sartaroshlar undan ta’lim olishga intilishdi. Bilimlar uzatilishi kerakligiga ishongan holda, u 1994-yilda Milanda Aldo Coppola akademiyasini tashkil etdi. Ushbu muassasa brendni afsonaviy qilgan texnikalarni saqlab qolish va rivojlantirishga yordam beradigan bo‘lajak ustalarni tayyorlash markaziga aylandi.

suratni Aldo Coppola matbuot xizmati taqdim etgan

Aldo bir lahza ham to‘xtamadi. U shou dasturlari yaratdi, dunyo bo‘ylab sayohat qildi, o‘g‘li bilan yangi atelelar dizayni ustida ishladi, ularni go‘zallik va uyg‘unlik falsafasi bilan to‘ldirdi. Uning kasbiga sadoqati 2013-yilda vafot etib, bebaho meros qoldirgunga qadar o‘zgarmadi. Bugungi kunda uning g‘amxo‘r rahbarligi ostida tarbiyalangan jamoa uning g‘oyasini amalga oshirishda davom etmoqda va brend ruhini jahon miqyosida tarannum etmoqda.

Aldo Coppola brendi hamon sartaroshlik san’ati olamida namuna bo‘lib qolmoqda. Uning falsafasi va mahorati sanoat me’yorlarini belgilaydi, oilaviy boshqaruv esa avlodlar davomiyligini ta’minlaydi. Aldo Koppola-kichik xalqaro rivojlanish uchun mas’ul, Italiya yo‘nalishini esa uning nabirasi Federika boshqaradi. Ular brend merosi va benuqsonligini kelajak avlodlar uchun asrab-avaylamoqda.