“Barefoot”: tabiatga qaytish

Tasavvur qiling, har bir sayr oyoq kaftlaringiz uchun yengil massajga aylanadi, oyoqlaringiz esa tabiat ko‘zlagandek harakatlanadi – siqilishlarsiz, qattiq qoliplarsiz va sun’iy amortizatsiyasiz. Aynan shu sababli tobora ko‘proq odamlar odatiy krossovkalarini yupqa tagcharmli sodda modellarga almashtiryapti.

Zamonaviy poyabzallar ko‘pincha oyoqning tabiiy biomexanikasiga zarar keltiradi. Natijada oyoq mushaklari bo‘shashadi, oyoq kafti egiluvchanligini yo‘qotadi, keyinchalik umurtqa va bo‘g‘imlarda muammolar paydo bo‘lishi mumkin.

Fotо: Pexels

Minimalistik poyabzal yupqa tagcharmi (odatda 3-6 mm) bilan ajralib turadi, bu esa yerni yaxshiroq his qilish va tabiiy muvozanatni saqlash imkonini beradi. Keng burun qismi barmoqlarning siqilmasdan erkin harakatlanishini ta’minlaydi, poshnasiz (nol drop) tuzilishi esa yurish paytida tananing tabiiy holatini saqlab qoladi.

Tadqiqotlar shuni ko‘rsatadiki, bunday poyabzalga o‘tish oyoq gumbazini mustahkamlaydi, qaddi-qomatni yaxshilaydi va jarohatlanish xavfini kamaytiradi. Vaqt o‘tishi bilan oyoqlar baquvvatlashadi, yurish yengil va ishonchli bo‘ladi. Bu minimalistik poyabzalning bir nechta asosiy ta’siri tufayli ro‘y beradi. Birinchidan, u oyoq mushaklarini mustaqil ishlashga undaydi, an’anaviy poyabzal esa bu vazifani biz uchun bajaradi. Ikkinchidan, yupqa taglik proprioretseptorlarni faollashtiradi, muvozanat va koordinatsiyani yaxshilaydi. Bundan tashqari, yumshoq amortizatsiyaning yo‘qligi bo‘g‘imlarga tushuvchi zarbni kamaytiradi va oyoqning tabiiy ravishda moslashishiga yordam beradi.

Ko‘pchilik ta’kidlashicha, bunday poyabzalda muntazam yurish oyoq gumbazining shakllanishiga yordam beradi va yassi oyoqlikni davolashda foydali. Poshnasiz tuzilish qomatga ham ijobiy ta’sir ko‘rsatib, bel va bo‘yindagi zo‘riqishni kamaytiradi.

Fotо: Pexels

Biroq “barefoot”larda yurishga asta-sekin ko‘nikish lozim. Odatdagi krossovkalarni darhol tashlab yuborish kerak emas – mushaklar va paylarga yangi yuklamalarga moslashish uchun vaqt berib, qisqa sayrlardan boshlagan ma’qul.

Bundan tashqari, oyoq kaftining egiluvchanligini rivojlantiring: cho‘zilish, gumbaz va barmoqlarni mustahkamlash mashqlarini bajaring. Yupqa taglikka asta-sekin o‘ting, avval ozgina amortizatsiyali poyabzaldan foydalaning, keyin esa iloji boricha yupqaroq taglikka o‘ting.

Eng muhimi, tanangizning signallariga quloq tuting: agar og‘riq paydo bo‘lsa, yuklamani kamaytirish va oyoqlarga moslashish uchun ko‘proq vaqt berish maqsadga muvofiq.