Botoksdan keratingacha: sochlarga mo‘ljallangan beauty-muolajalar haqida nimalarni bilishingiz kerak?
Silliqlik, jilo, hajm
Go‘zallik salonidagi botoks, keratin, laminatsiyalash, nanoplastika kabi muolajalar yaltiroq hamda osongina turmaklanadigan sochlar haqidagi orzungizni ro‘yobga chiqarishni va’da qiladi. Bu nomlar orasida adashmasdan, aynan sizga mosini tanlash uchun nima qilish kerak? Biz sochlarga mo‘ljallangan muolajalarni an’anaviylaridan eng zamonaviylarigacha to‘pladik va ular kimga kerag-u, qanday samara berishini tahlil qildik.
Sochlarga beziyon botoks-terapiya
Go‘zallik olamida ham “abadiy trendlar” mavjud. Agar fashion-sanoatda bu kichik qora ko‘ylak bo‘lsa, salondagi soch parvarishida bu — botoks. Nomiga qaramay, ushbu muolajaning go‘zallik inyeksiyalariga hech qanday aloqasi yo‘q. Soch uchun botoks — bu chuqur tiklovchi kokteyldir. Uning tarkibida aminokislotalar, vitaminlar, proteinlar, gialuron kislotasi va moylar mavjud.
Ta’siri: sochlar yanada zich, tarang va yaltiroq bo‘ladi. Bu muolaja xira, mo‘rt, bo‘yash yoki tez-tez turmaklash oqibatida zaiflashgan sochlar uchun ayni muddao.
fotо: spotlight
Sochlar silliqqina bo‘lishi uchun keratin bilan tekislash
Keratin so‘nggi o‘n yillikning eng keng tarqalgan parvarish turlaridan biri sanaladi. Mazkur muolajaning asosi soch tarkibining 90 foizini tashkil etuvchi oqsil - suyuq keratindan iborat. U harorat ta’sirida soch tolasiga singib, sochlarni ideaal darajada tekis va silliq qiladi.
Ta’siri: sochlar boshqa hurpaymaydi, yaltirab turadi va oson turmaklanadi. Biroq, sochlaringizning tabiiy hajmi yo‘qolishi ehtimoli borligini hamda ayrim ishlab chiqaruvchilar taqdim etadigan keratin tarkibida formaldegid bo‘lishi mumkinligini esda tutish lozim. Zamonaviy salonlar sochlarga beziyon, yumshoq formulalardan foydalanadi, ammo shunga qaramay tarkibni oldindan aniqlagan ma’qul.
fotо: freepik
Soch tuzilishini o‘zgartirmaydigan laminatsiyalash jilosi
Laminatsiyalash — sochga yupqa shaffof parda hosil qiluvchi maxsus aralashmani surtish orqali amalga oshiriluvchi kosmetik parvarish turi. Bu parda kutikulani “muhrlaydi”, namlik va ozuqa moddalarini soch tolasi ichida ushlab turadi, sochni tashqi ta’sirlardan himoya qiladi.
Ta’siri: sochlar yanada parvarishlangan ko‘rinishga ega bo‘lib, ko‘zni qamashtiradigan jilo taratib turadi. Biroq shuni ta’kidlash lozimki, ta’siri 6 haftaga yetuvchi laminatsiyalash sochlarni davolamaydi, balki shikastlanishlarni yashiradi xolos.
fotо: freepik
Nanoplastika: silliqlik va ozuqa bir idishda
Agar keratinning zamonaviy muqobilini izlayotgan bo‘lsangiz, “nanoplastika” muolajasiga e’tibor qaratishni tavsiya qilamiz. Laminatsiyalashdan farqli o‘laroq, u haqiqatdan ham soch tuzilishini o‘zgartiradi, uni organik kislotalar, oqsillar va aminokislotalar yordamida tekislaydi. Odatda tarkibida formaldegidlar bo‘lmaydi, shu sababli bu usul ancha beziyon va yumshoq sanaladi.
Ta’siri: sochlarni paxmoqlanish va chigallashishdan xalos qilib, 5 oy saqlanuvchi tekis va silliq ko‘rinish beradi. Ammo nanoplastika yupqa sochlarga tavsiya etilmaydi, shuningdek mazkur muolaja ko‘p vaqt talab etadi.
fotо: freepik
Sog‘lom va parvarishlangan sochlar bizga tabiat tomonidan jingalak gajaklar yoki yumshoq to‘lqinsimon kokillar ko‘rinishda in’om etilgan bo‘lishi mumkin. Bu faqat sizga xos bo‘lgan noyob go‘zallikning bir bo‘lagidir. Shu boisdan, botoks, keratin yoki ularning muqobillarini tanlayotganda, zamonaviy nomlarga emas, balki aynan sochlaringiz ehtiyojiga e’tibor qarating.
