Dengiz tuzining hayratomuz kuchi

Qadim zamonlardan beri, dengiz tuzi noyob xususiyatlari va salomatlikka foydali boʻlgan ta’siri bilan qadrlanadi. Dengiz tubidan olinadigan tabiiy mahsulot soch va teri parvarishining ajralmas qismiga aylangan. Shu bilan birga, u yaxshi kayfiyatni taʼminlaydigan muhim elementga ham aylangan. ELLE dengiz tuzining ayol organizmi uchun foydasi va salomatlik hamda goʻzallikni saqlab qolishda uning qanday yordami tegishi mumkinligi haqida gapiradi.

Soch va teri parvarishidagi o‘rni

Dengiz tuzi yuz, tana va soch uchun qo‘llaniladigan vositalarning ingredientlari ro‘yxatidan joy olgan. Masalan, ko‘plab skrablar, pilinglar, losyonlar, yuz va tana uchun moʻljallangan niqoblar tarkibida aynan dengiz tuzi mavjud. Tuzli granulalar, yuzdagi teshiklarni chuqur tozalashga va ifloslanishni yoʻqotishga yordam beradi. Teri tezroq yangilanadi, yanada silliq va porloq holga keladi. 

Shu bilan birga, mahsulot minerallarga boy (magniy, kalsiy va kaliy), u yogʻ faoliyatini balanslashga yordam beradi va terining himoya qobigʻini asraydi. Bu esa, oʻz navbatida terini chuqur namlantirishga va oziqlantirishga olib keladi. Dengiz tuzining yalligʻlanishga qarshi xususiyatlari esa akne, ekzema va psoriaz kasalliklarini davolashda yordam beradi.

Soch parvarishida ham dengiz tuzidan keng qo‘llaniladi. U bosh terisini tozalashda hamda qon aylanishini yaxshilashda eng kerakli vosita sanaladi. Bu mahsulot dengiz suvi bilan birga qo‘llanilganda esa sochga yanada qalinlik va tabiiylik baxsh etib, oʻzgacha  tuzilish va hajmni beradi.

Foto: Unsplash

Salomatlik uchun tuganmas foydasi 

Dengiz tuzi, shuningdek, sogʻliq uchun qator foydali xususiyatlarga ega. Masalan, tuz bilan vanna qabul qilish, mushaklarni boʻshashtirishga, toliqish va charchoqning oldini olishga yordam beradi. Shu bilan birga, boʻgʻinlardagi yalligʻlanish va og‘riqni ham bartaraf etadi. Muntazam ravishdagi tuzli vannalar toksin va shlaklarning teri orqali chiqib ketishiga sabab boʻladi. Qolaversa, stresning oldini olib, uyqu sifatini oshirishga yordam beradi. Dengiz tuzi bilan massaj esa, sellyulitni bartaraf etish va tananing umumiy tonusini oshirish uchun eng kerakli muolajalardan biridir.

Dengiz tuzini qoʻllash qon aylanishini va organizmning umumiy holatini yaxshilashga sabab boʻladi. Hattoki uning tarkibidagi mikroelementlar immunitet tizimini mustahkamlashga ham qodir. Tabiiy dengiz mahsulotini muntazam ravishda qoʻllash va u bilan tanani parvarish qilish, yoshlik, goʻzallik hamda salomatlikni saqlab qolishga yordam beradi.

Foto: Unsplash