Don‘t Be Shy: Kilian Paris‘ning Toshkentdagi ziyofati qanday o‘tdi

В

18-sentyabr oqshomida Toshkent Parij hashamati va yarqiroq erkinlik muhitiga cho‘mdi: 12 restorani Kilian Paris va Parfum Gallery Begim hamkorligidagi ziyofatga mezbonlik qildi. Brend do‘stlari, blogerlar va ommaviy axborot vositalari vakillari The Liquors iforlar to‘plamini nishonlash uchun “Don‘t Be Shy” shiori ostida to‘planishdi.

Restoran bir kechaga qoidalarsiz maydonga aylandi: yorqin Don‘t Be Shy foto hududi, mashhur Angels‘ Share kompozitsiyasiga ishora qiluvchi eman bochkalaridan yasalgan installyatsiya va afsonaviy atirlarga bag‘ishlangan mualliflik kokteyllari yig‘ilganlarni mamnun etdi. Roses On Ice yengil ifori deysizmi yoki Fievre Verte atiriing o‘ziga rom etuvchi absent akkordi deysizmi, har bir ichimlik parfyumeriya san’atiga bitilgan kichik madhiyadek yangradi. Mehmonlar DJ Bella setlaridan zavqlanib, raqsga tushishdi, fotokamera obyektivi nishoni ostida press-voll oldida yulduzday porlashdi. Ziyofat muhiti vaqt hisobidan adashadigan, tun bo‘lsa yangi sarguzashtlarni va’da qiladigan maxfiy kechani eslatdi.

Kilian Paris olami

2007-yilda Kilian Hennessy tomonidan asos solingan Kilian Paris brendi ilk to‘plamlaridanoq yorug‘likdan zulmatga, nafs balosidan poklikka qadar bo‘lgan tushunchalarni qamrab olib o‘zini ziddiyatlar ustasi sifatida namoyon etdi. Bugun brend olami 5 toifaga bo‘linadi, bular: “Yengil”, “Maftun etuvchi”, “Konyak”, “Dud isili” va “Kokteyllar”. Aynan “Kokteyllar” turkumi iforlari Toshkent kechasining bosh qahramoniga aylandi. The Liquors to‘plamini Hennessy oilasi merosi va ziyofat madaniyatiga bag‘ishlangan madhiyaga qiyoslash mumkin. Angels‘ Share musallas omborlaridagi konyakni tatib ko‘rish jarayonini eslatsa, Apple Brandy on the Rocks Nyu-York muhitini yaratadi, Old Fashioned esa Shotlandiya qadimiy qasridagi kamin yonida kechgan oqshom hissiyotini beradi. Art Deco qadahlariga o‘xshatib yaratilgan shisha idishlar sizni go‘yo yashirin degustatsiyaga chorlaydi, bunda ifor ichimlikka aylanadi.“Har kimning shaxsiy iforlar to‘plami bo‘lishi lozim, deya hisoblayman. Bugun qaysi atirni ishlatishni tanlayotganimda kayfiyatimga va shaxsiyatimning qaysi tomonini namoyon etmoqchi ekanligimga qarayman," - deydi Kilian Hennessy. 

Kilian Paris Don‘t Be Shy kechasida ozodlik, yengillik va lazzatdan iborat kayfiyat hukmron bo‘ldi. Xushbo‘y iforlar hikoya kabi tarqalib, mehmonlarning qalbida yoqimli iz qoldirdi.