Gastronomiya va madaniyat uyg‘unlashgan palov muzeyi

Oshni kapgir ushlagan emas, qozon ostidagi olovni boshqargan odam pishiradi” — bu qadimiy maqolning ma’nosini bu yerda yanada teranroq anglaysiz. Toshkentda 5000 kvadrat metrdan ortiq maydonni egallagan, nafaqat milliy taom, balki O‘zbekistonning butun madaniy an’analariga bag‘ishlangan noyob maskan — Palov muzeyi o‘z eshiklarini ochdi.

Фото: Бахром Бекмирзаев

Loyiha tashabbuskori — mashhur toshkentlik restorator va Caravan gastronomik brendi asoschisi Temur Musin tamal toshini qo‘ydi. Aynan u bu maskanda madaniyat, gastronomiya va me’moriy merosni uyg‘unlashtirib, palov chinakam san’at asariga aylangan go‘zal bir joy yaratdi.

Suratlar: Baxrom Bekmirzayev

Bu jonli muzeyda antik idish-tovoqlar, qozonlar, samovarlar va tandirlar to‘plami mavjud bo‘lib, unda tarix va gastronomiya, an’anaviy hunarmandchilik va madaniyatga zamonaviy yondashuv asosida uyg‘unlashgan. Palov muzeyi taomning san’atga, an’analarning esa faxr manbaiga aylanishi haqida so‘zlaydi.

Suratlar: Ernest Kurtveliyev

Yuz yillik tarixga ega haqiqiy noyob yodgorlik bo‘lmish ulkan o‘ymakor darvozadan o‘tib, siz sharqona ertak olamiga kirib borasiz. Ayvonlarning mayin soyasi, so‘lim va bahavo tevarak, Salar arig‘ining jilvakor oqar suvlari, akademik Shahobiddin akaning nafis o‘ymakor qandillari nuri, qo‘lda ishlangan ustunlar va shiftlar sizni go‘yo o‘tmishga olib ketgandek tuyuladi. Shu bilan birga, muzey zamonaviy hayot bilan hamohang yashaydi.

Suratlar: Baxrom Bekmirzayev

Ko‘prik bo‘ylab mashhur o‘ymakor ustalar Abdulla Boltayev va Ota Polvonov yaratgan XIX asrga oid Xorazm ustunlari joylashgan. Ularning ishlari 1937-yilda Parijda o‘tkazilgan Jahon dekorativ-amaliy san’at ko‘rgazmasida e’tirof etilgandi. Bugun esa ular muzey me’moriy ansambliga aylanib, qadimiy texnologiyalar zamonaviy muhandislik yechimlari bilan uyg‘unlashgan holda o‘zining mustahkamligi va nafosatini saqlab qolmoqda.

Suratlar: Ernest Kurtveliyev

Zal ichida fotosuratchilar ish boshlagan, fotozonalar yaratilmoqda, dasturxonlar bezatilmoqda. Qo‘lda yasalgan sopol idishlar, qadimiy anjomlar va har bir taomning go‘zalligini ta’kidlovchi yoritish tizimi ko‘zni quvontiradi.

Suratlar: Aleksandr Borisov

Tadbir mehmonlariga to‘rt xil palov taqdim etildi: Toshkent bayramona palovi, devzira qorakiltiriq guruchidan tayyorlangan Andijon palovi, So‘x vodiysidan keltirilgan cho‘ng‘ara jaydari guruchli Qo‘qon palovi hamda Caravan restorani bosh oshpazining zaytun moyida tayyorlagan maxsus palovi… Taomlar XX asr boshlariga oid, O‘zbekiston kulolchilik maktablarining boyligini aks ettiruvchi muzey naqshli laganlarida tortilib, bu tadbirga alohida joziba baxsh etdi.