Golografik ta’kidlar: fazodek nur sochadigan pardoz

Yulduzlar olamidan ilhomlangan golografik pardoz tendensiyasi bugungi modalar ko‘rgazmasining har bir sahnasida, mashhurlar Instagram sahifalarida porlab turibdi. Gap shunchaki yaltiroq kukunlar haqida emas, bu yorug‘likning sehrli o‘yini, quyosh nurlari yoki oy ziyosi ostida silliq jilvalanadigan yorqinlik hikoyasidir. Har bir harakat — yangi bir tus, har bir oynaga qarash — galaktik porloqlikning chaqnashidek.

Elle O‘zbekiston ushbu maqolada yorug‘lik alkimyosining sirlari bilan bo‘lishadi: nafis pushti sadafdan to‘q ko‘k glittergacha.

Golografik effektning asosi — mikroskopik yorug‘likni aks ettiruvchi zarralar bo‘lib, ularning ohanglari odatda pushti, moviy, lavanda va kumush ranglar atrofida bo‘ladi. Bunday zarrachalar haylayterlar, ko‘z soyasi, lab bo‘yog‘i, hattoki tana pigmentlari tarkibiga ham kiradi. Ammo bu tendensiya oddiy porloqlikdan iborat emas — bu mahoratli muvozanat masalai hamdir, aks holda sizni diskosharga aylantirib qo‘yishi hech gap emas.

Shu bois, zamonaviy yorqin bo‘yanishni yaratishda quyidagi uchta asosiy qoidani unutmaslik zarur:

• Kunduzgi obraz uchun bitta “aksent” yetarli: masalan, birozgina golografik hajlayter yoki labda yaltirab turgan bo‘yoq.
• Oqshom uchun esa biroz dramatizmdan foydalanish mumkin: charaqlagan ko‘z soyasi va podvodka bilan uyg‘unlashtirish, lablarga esa kamalak tusidagi yaltirab turgan shaffof bo‘yoq surtish mumkin.
• Eng muhimi — teri tusini hisobga olish: sovuq ranglar (lavanda, moviy) och terilarga mos tushadi, iliq ranglar (oltin, pushti) esa to‘qroq teri egalari uchun ayni muddao.

fotо: instagram \ @shirinnabati.makeup

Golografik bo‘yanishda aksent yaratish uchun faqat kosmetika sumkangizdagi barcha yaltirab turuvchi vositalarni jamlashning o‘zi kifoya emas. Muhimi — ularning tuzilmasi, ohangi va yorug‘likni aks ettiruvchi zarrachalarning hajmiga ham e’tibor qaratishdir.

Bu yorug‘lik qaytaruvchi zarrachalar ultra mayda mikroshimmerlardan tortib to yirikroq, yengil yaltiraydigan flakey elementlargacha ega bo‘ladi. Zarra qancha mayda bo‘lsa, yaltirash shuncha nafis va nozik bo‘ladi; qancha yirik bo‘lsa — effekt shuncha yorqin va dramatik tus oladi. Mikropigmentlar odatda haylayterlar va suyuq ko‘z soyalarida uchraydi — ular ko‘zga deyarli ko‘rinmaydi, biroq nam va yumshoq yaltirash ta’sirini beradi. O‘rtacha hajmdagi zarrachalar ko‘proq kremli tuzilmalar va upalarda ishlatiladi — ular tarqoq yorug‘lik nuri va nozik tus o‘yini hosil qiladi. Katta yaltirab turuvchi elementlar esa ayniqsa suratga tushish uchun mos: ular harakatda ko‘z ilg‘ar-ilg‘amas ko‘zgudek jilva, ko‘p qatlamli porloqlik yaratadi.

fotо: instagram \ @gigihadid

Yuzda niqob ta’sirini bermagan holda porlash hosil qilishda teksturalarning roli ham nihoyatda muhim. Bu borada eng ma’qul variant suyuq va kremli bo‘yanish vositalaridir. Ular yorug‘likni aks ettiruvchi pigmentlarning yuqori kontsentratsiyasi bilan ajralib turadi, teriga mukammal yoyiladi va u bilan butunlay uyg‘unlashadi hamda ho‘l pardek yakuniy effekt yaratadi. Masalan, barcha to‘y vizajistlari yaltirab turuvchi kremli ko‘z soyalarni ustun ko‘rishadi: ular qovoqlarda yig‘ilib qolmaydi, nihoyatda barqaror, yengil surtiladi va bir necha qatlam ustiga qatlam qilib qo‘llash mumkin.

Mazkur texnikaning eng betakror xususiyatlaridan yana biri — “buqalamun” (xamelion) rang palitrasi bo‘lib, u tanlangan rangning butun spektrini ochib beradi. Bu yerda eng muhimi — o‘zingizning rang tipingizga mos tusni topa bilish: u go‘zalligingizni yanada yorqinroq namoyon qiladi.

Masalan, binafsha-ko‘k ohang — go‘yo qor malikasining illyuzion ta’sirini uyg‘otadi, ayniqsa och terili ayollarda ajoyib ko‘rinadi. Pushti-oltin rang esa opal yaltirash bilan uyg‘unlashgan holda har qanday obrazga mos tushadi: u iliq va neytral teri ohanglarini nafis tarzda ajratib ko‘rsatadi. Quyoshda toblangan terida esa bu tus ayniqsa hashamatli jilvani beradi.

fotо: instagram \ @katyperry

Bunday pardozning asosiy xususiyati uning fotogenikligi bo‘lib, kamera kamalak, buqalamun yoki shimol yog‘dusi imitatsiyasini yaratadigan tovlanuvchi teksturalar effektini yaxshi ko‘radi. Mahsulotning dolzarbligi uning universalligida: yengil shu’la kundalik obraz uchun juda mos keladi, ko‘p qatlamli surtish esa kechki pardozning chidamliligi va ifodaliligini ta’minlaydi.