Jahon yulduzlarining sevimli mashg‘ulotlari
Mashhurlar o‘zini qanday qilib ideal formada saqlab qoladi
Gollivud yulduzlari doimo a’lo formada bo‘ladi, lekin chiroyli tana va kelishgan qomat ortida faqat genetika emas, balki aniq mashg‘ulotlar tizimi ham turadi. Boks, pilates, yoga yoki funksional mashg‘ulotlar – mashhurlar sportni hayot tarzining bir qismiga aylantirishni, kundalik mashg‘ulotlardan zavqlanishni bilishadi.
Jizel Byudxen
Muvaffaqiyatli supermodel va sog‘lom turmush tarzining haqiqiy ramzi Jizel Byudxen “sog‘ tanda – sog‘lom aql” falsafasiga amal qiladi. Model o‘zini formada saqlab turish va tetik bo‘lish uchun turli xil faoliyat turlarini birlashtiradi.
Jizelning kundalik rejimidagi asosiy elementlardan biri – nafas olish mashqlari va meditatsiya bilan birgalikda amalga oshiriladigan yoga mashqlaridir. Bundan tashqari, u boks, pilates, funksional mashg‘ulotlar, serfing bilan shug‘ullanadi va ochiq havoda sayr qilishni kanda qilmaydi.
Kendall Jenner
Dunyodagi eng talabgor modellardan biri Kendall Jenner nozik va kelishgan qomatni saqlab qolish uchun turli xil mashg‘ulotlarni birlashtirishni ma’qul ko‘radi. Avvalo, bu kuch mashqlari: o‘tirib-turish, sakrash, planka va press mashqlari. Keyin kardio, boks va yuqori intensivlikdagi intervalli mashg‘ulotlar (HIIT). Sakrash, yugurish, o‘z og‘irligi bilan mashqlar va qisqa tanaffuslarning bu uyg‘unligi kaloriyalarni samarali yo‘qotadi va metabolizmni tezlashtiradi.
Shu bilan birga, faol yuklamalarni yoqtirishiga qaramay, model yoga va pilates bilan ham shug‘ullanadi va sog‘lom turmush tarzini olib borishga intiladi. Kendall ot minishni, yugurishni, suzishni va shunchaki ko‘p harakat qilishni yaxshi ko‘radi, eng muhimi, uning ta’kidlashicha, bu jarayondan zavq olishdir.
Xeyli Biber
Ko‘plab yulduzlardan farqli o‘laroq, Xeyli sport zalida charchatadigan mashg‘ulotlarga intilmaydi, balki o‘zini kuchli va sog‘lom his qilishga yordam beradigan mashg‘ulotlarni tanlaydi. Masalan, u haftada bir necha marta reformerda pilates bilan shug‘ullanadi. Uning fitnes dasturining boshqa muhim qismlari yoga va cho‘zilish mashqlaridir.
Agar Xeyli yanada jadal mashg‘ulotlarga ehtiyoj sezsa, u boksni tanlaydi. Bu nafaqat o‘zini tetik tutishga, balki stressdan xalos bo‘lishga ham yordam beradi. Shuningdek, model kardio-mashqlarni yoqtiradi: yugurish, arqonda sakrash va raqs mashg‘ulotlari.
Kaya Gerber
Modellik biznesining yosh yulduzi nafaqat go‘zallikni, balki mashhur onasi Sindi Kroufordning sport intizomini ham meros qilib olgan. Kaya barcha mushak guruhlarini ishga soladigan murakkab mashqlarni afzal ko‘radi. Uning mashg‘ulotlarida o‘tirib-turish, sakrash, planka, gantellar va o‘z og‘irligi bilan bajariladigan mashqlar ko‘p.
Ko‘pgina modellar singari, Kaya ham muntazam ravishda reformerda pilates va yoga bilan shug‘ullanadi, bu esa qomatni yaxshilaydi, uzoq parvozlar hamda suratga olishlardan keyin charchoqni yozadi.
Kendis Sveynpol
Victoria’s Secret “farishtasi”ning tanasi egiluvchanlik, kelishganlik va ayollik xususiyatlarini o‘zida mujassam etgan.
Kendis o‘z vazni bilan kuch mashqlarini va butun tanasini mustahkamlash uchun boksni afzal ko‘radi.
Asli Janubiy Afrikalik bo‘lgan model serfing va suzishni yaxshi ko‘radi. Uning aytishicha, bu nafaqat ajoyib mashg‘ulot, balki uning nozik, chiroyli qomatining siri hamdir. Bundan tashqari, Kendis yoga bilan haftasiga bir necha marta shug‘ullanadi. Victoria’s Secret “farishtasi”ning asosiy tamoyili esa o‘z tanasiga quloq solish: agar u dam olishni talab qilsa, o‘zini mashg‘ulotlarga majburlamaslik.
