Jek Makkalou va Lazaro Ernandes

Loewe’da Jek Makkalou va Lazaro Ernandes ismli dizaynerlar brendning barcha kolleksiyalarini, jumladan ayollar va erkaklar kiyimlari, aksessuarlar hamda charm buyumlarini yaratish bilan shug‘ullanishi e’lon qilindi. Faoliyatlarining yangi bosqichi doirasida ular Nyu-Yorkdan brendning ijodiy ofislari joylashgan Parijga ko‘chib o‘tishadi. Biroq dastlabki kunlarni 1846-yilda Loewe asos solingan joy – Madridda o‘tkazishni rejalashtirmoqdalar.

Bosh ijrochi direktor Paskal Lepuar dizaynerlar tanlovini shunday izohladi: “Ular nafaqat ijodiy qobiliyatga, balki moda doirasidan tashqariga chiqib, madaniy jihatlarni qamrab oladigan tadbirkorlarcha qarashga ham ega”.

Lepuarning so‘zlariga ko‘ra, Makkalou va Ernandes o‘zlarining g‘ayrati, ishtiyoqi va hazilkashligi bilan Loewe’ning korporativ madaniyatiga uyg‘un ravishda mos keladi. Loewe uchun ularning debyut kolleksiyasi sanasi hali ma’lum qilinmagan.