Keyt va Uilyam: birgalikdagi ma’ruzadan umr yo‘ldoshligigacha

Bu yil Keyt va Uilyam turmush qurganiga 14 yil to‘ldi va shu yillar davomida juftlik barqarorlik va o‘zaro qo‘llab-quvvatlash timsoli bo‘lib qolmoqda. Shunga qaramay, ularning tarixi qirollik unvonlari va tantanali tadbirlardan emas, balki oddiy universitet kunlaridan boshlangan. Keling, tasodifiy uchrashuvlar va oddiy lahzalardan qanday qilib haqiqiy muhabbat tug‘ilganini eslaylik.

foto: instagram \ @princeandprincessofwales

Keyt shlyapa kiyish san’atini va tomoshabinlarni ishonch bilan kutib olishni o‘zlashtirgunga qadar uning hayoti mutlaqo boshqacha edi. U o‘qir, yotoqxonada yashar, talabalik yillaridan zavqlanar va bu yo‘l uni qirol saroyiga olib borishini tasavvur ham qilmagan bo‘lsa kerak. Ehtimol, Uilyam ham o‘sha paytda bu uchrashuv uning hayotini qanchalik o‘zgartirib yuborishini bilmagan bo‘lsa kerak.

Ular Sent-Endryusda — Shotlandiya universitetida uchrashishdi. Bu Uilyam uchun matbuot e’tiboridan vaqtincha chetda qolish imkoniyati, Keyt uchun esa yangi narsalarni sinab ko‘rish imkoni bo‘ldi. Badavlat, ammo zodagon bo‘lmagan oiladan chiqqan qiz kampusga tez moslashdi. Keyt kamtarin edi, e’tiborni tortishga intilmasdi, undan kutilgan rolni o‘ynamasdi. Aynan shu bilan u o‘ziga tortardi.

foto: instagram \ @princeandprincessofwales

Dastlab ular o‘rtasida do‘stlik paydo bo‘ldi. Ular bir xil kafelarga borishar, seminarlarni muhokama qilishar, universitet o‘yinlariga qatnashar va umumiy do‘stlar davrasida bo‘lishardi. Keyt uning soyasida yo‘qolib qolmasdi — aksincha, uning yonida Uilyam shahzoda emas, oddiy yigit bo‘la olardi: haqiqiy, unvonsiz.

Burilish nuqtasi talabalar moda namoyishi bo‘ldi. Unda Keyt Sharlotta Toddning yarim shaffof ko‘ylagida paydo bo‘ldi. Manbalarga ko‘ra, aynan o‘sha kechqurun u qizga boshqacha nigoh bilan qaradi va unda ilgari payqamagan narsalarni ko‘rdi. Keyinchalik u ularning munosabatlari boshidanoq o‘ziga xos tuyulganini tan oldi, lekin aynan o‘sha paytda ko‘proq narsani his qilayotganini angladi. Asta-sekin ular o‘rtasida aloqa shakllana boshladi, keyinchalik bu mustahkam ittifoqqa aylandi.

foto: shutterstock \ Malcolm Clarke

Ular 2007-yilda qisqa muddatli ajralishni ham boshdan kechirishdi. O‘shanda ularning munosabatlariga shubha oraladi: tungi hayot va ziyofatlarga berilib ketgan Uilyam beqaror ko‘rinar, ularning yo‘llari tobora uzoqlashib borardi. Bu uzilish uzoq davom etmadi, ammo juda og‘riqli bo‘ldi va pirovardida ularning bir-biriga qanchalik muhimligini anglashga yordam berdi.

Keyt intervyu bermadi, shikoyat qilmadi, shunchaki hayotini davom ettirdi. U o‘ziga ishongan ko‘rinardi. Xotirjam. Go‘zal. Uilyam esa qaytib keldi. Do‘stlari bilan Afrikaga birgalikda sayohat qilishganida, u sevgilisiga uzoq kutilgan nikoh taklifini qildi — savanna manzarasi fonida, onasining besh karatli yoqut va olmoslar bilan bezatilgan uzugi bilan. Keyinchalik u uzukni yo‘lda yo‘qotib qo‘yishdan qo‘rqib, uch hafta davomida ryukzakda olib yurganini tan oldi. Biroq hammasi ko‘ngildagidek bo‘ldi: qiz yurakdan “ha” dedi.

foto: instagram \ @princeandprincessofwales

2011-yil 29-aprelda Keyt millionlab odamlarning olqishlari ostida Aleksandr Makkuinning libosida mehrobga chiqdi. Kelinning dugonasi uning singlisi Pippa, Uilyamning guvohi esa shahzoda Garri edi. To‘y Vestminster abbatligida bo‘lib o‘tdi va nafaqat butun dunyodagi qirollik xonadonlari rahbarlari va siyosatchilarni, balki oddiy odamlar ham to‘plandi. Er-xotin Uilyamning maktab direktori, enagasi, Middltonlar oilasining qassobi, pochtachi, Keytning yoga va fitnes bo‘yicha murabbiyini taklif qilishdi. Bu shaxsiy va rasmiy tomonlar uyg‘unlashgan kun, yangi davrning boshlanishi, ammo iliq, deyarli oilaviy kayfiyatda edi.

foto: instagram \ @princeandprincessofwales

O‘shandan beri ko‘p narsa o‘zgardi. Ular Kembrij gersogi va gersoginyasi, keyin esa Uels shahzodasi va malikasi bo‘lishdi. Birgalikda son-sanoqsiz rasmiy qabullar, safarlar, yangi unvonlarni va haqiqiy hayotda bo‘lganidek, murakkab davrlarni boshdan kechirdilar. Shunday davrlardan biri Keytning sog‘lig‘i bilan bog‘liq muammolarga duch kelgan so‘nggi pallada bo‘ldi. U jarrohlik amaliyotini matonat bilan o‘tkazdi, keyinchalik esa tashxis haqida ochiq gapirdi va ko‘pchilik oldida kuch-qudrat va samimiylik namunasi o‘laroq namoyon bo‘ldi. Ammo asosiy narsa o‘zgarishsiz qoldi: ular hamon yonma-yon, birga. Ular uchta farzandni tarbiyalamoqdalar: shahzoda Jorj, malika Sharlotta va shahzoda Lui. Chamasi, ular hali ham bir xil hazillar aytib kulishni, bir-birlarini qo‘llab-quvvatlashni va mavqeni emas, balki yonidagi insonni qadrlashni bilishadi.

fotо: instagram \ @princeandprincessofwales