Maldiv orollariga sayohat

Oppoq qum, moviy suv, cheksiz botayotgan quyosh shafaqlari va mutlaq uyg‘unlik hissi... Maldiv orollari Hind okeanida joylashgan 1192 ta marjon oroldan iborat bo‘lib, hashamatli dam olish uchun ideal joy hisoblanadi. ELLE O‘zbekiston tahririyati mukammal ta’tilni o‘tkazish uchun qayerga borish va nimalar bilan shug‘ullanish mumkinligi haqida ma’lumot beradi.

Barcha orollarning taxminan 200 tasida mahalliy aholi istiqomat qiladi, yana 160 tasi kurort hududlariga aylantirilgan. Qolganlari esa qo‘l tegmagan holda saqlanmoqda. Maldivda har bir orol alohida dunyo, ular ichidan aynan sizga mos keladiganini tanlash muhim:

• Maafushi – mehmonxonada yashab, mahalliy madaniyatga sho‘ng‘ish va atrofdagi laguna-ko‘rfazlarni o‘rganish mumkin bo‘lgan kam sonli aholi yashaydigan orollardan biri;
• Romantik dam olish uchun ajoyib joy Veligandu hisoblanadi. U yerda suv ustidagi villalar, sokin plyajlar va to‘liq xotirjamlik muhiti mavjud;
• Agar siz haqiqatan ham mo‘jizalar istasangiz, ulkan mantalar bilan suzish va tungi suvlarni yulduzli osmonga aylantiradigan biolyuminessent planktonni ko‘rish mumkin bo‘lgan Baa Atollga sayohat qilishingiz kerak.
• Okean qa’riga sho‘ng‘ishni orzu qilganlarga Ari Atoll – g‘avvoslik va snorkling uchun mashhur joy;
• Romantiklardan tortib, bolali oilalargacha bo‘lgan barcha uchun eng ko‘p qirrali ko‘ngilochar orol – Kuramati hisoblanadi.

Sayohat uchun eng qulay vaqt – noyabrdan aprelgacha, yomg‘irlar mavsumi tugagan va okean tinch bo‘lgan payt. Ammo boshqa mavsumda ham (may - oktyabr) bu yerda issiq va tabiatdan bahramand bo‘lish mumkin.

Fotо: Unsplash

Sokin plyaj dam olishidan tashqari, bu yerda siz bo‘sh vaqtingizni turli tarzda o‘tkazishingiz mumkin:

Suvosti dunyosiga sho‘ng‘ish

Maldiv orollarida boshdan kechirish mumkin bo‘lgan eng ajoyib narsa – bu snorkling va dayving yordamida suv osti dunyosini o‘rganishdir. Bu yerdagi suv shu qadar tiniqki, hatto oddiy niqob bilan ham marjon riflarini, tropik baliqlar to‘dasini, ba’zan skatlarni ko‘rish mumkin.

Yaxtada sayr qilish va gidrotsiklda uchish

Quyosh botishi paytidagi kruizlar, kichik orollar orasida gidrotsiklda sayr qilish, faqat suv qaytganda paydo bo‘ladigan qumli qirg‘oqlarga sayohat qilish – bularning barchasi sizga haqiqiy Maldiv atmosferasini his qilish imkonini beradi.

Fotо: Unsplash

SPA va suv villalarida dam olish

Ochiq havoda massaj, to‘lqinlar shovqini ostida meditatsiya, cheksiz okeanga qaragan hovuzda kechqurun cho‘milish mutlaq xotirjamlikka erishishga yordam beradi. Bu yerdagi muolajalar o‘ziga xos: tabiiy moylar, xushbo‘y gullar va hatto orollar qirg‘oqlaridan yig‘ilgan dengiz tuzidan foydalaniladi. Agar yolg‘izlikni xohlasangiz, ertalab moviy laguna suviga sakrash bilan boshlanadigan suv villasida shunchaki dam olishingiz mumkin.

Ekstremal suv o‘yinlari

Maldiv orollarida faol dam olishni sevuvchilar uchun ham ko‘plab o‘yin-kulgilar mavjud. Bu yerda kaytserfingni sinab ko‘rish, flyboardda suv ustida uchish, veykbordda suzish yoki katerga o‘rnatilgan parashyut bilan havoga ko‘tarilish mumkin.

Fotо: Unsplash

Ochiq osmon ostidagi va suv ostidagi restoranlar

Yulduzlar ostidagi plyajda yoki shisha devorlar orqali dengiz jonzotlarini kuzatish mumkin bo‘lgan suv osti restoranida kechki ovqat eng yorqin xotiralardan biri bo‘ladi. Orollarda eng yangi dengiz mahsulotlaridan tayyorlangan taomlar, ekzotik kokteyllar va maxsus shirinliklar taklif etiladigan joylar mavjud.

Xotira uchun fotosuratlar

Bu yerda har bir joy tabriknomaga o‘xshaydi. Albatta, oppoq plyajda, suv villasida yoki okean o‘rtasidagi qumli qirg‘oqda fotosessiya uyushtiring. Axir bu yerdagi har bir lahza xotirangizda abadiy saqlashga arzigulik.