O‘zlikka yo‘l: ayol o‘zini qanday namoyon qilishi mumkin
Orzuingiz sari ilk qadamlar
O‘zni anglash – bu shunchaki maqsadlarga erishish yoki kasbiy muvaffaqiyat emas. Bu o‘z salohiyatingizni ochish, kuchli tomonlaringizni namoyon etish, o‘zingiz va istaklaringiz bilan uyg‘unlikni topish imkoniyatidir. Ko‘pchiligimiz uchun bu yo‘l oddiy savoldan boshlanadi: “Orzuimdagi hayot qanday?” Aynan orzular bizni yangi yutuqlarga undaydi va nimaga intilayotganimizni hamda atrofimizdagi dunyoni qanday ko‘rishni xohlayotganimizni anglashga yordam beradi.
Ammo orzularni qanday amalga oshirish mumkin? Nimadan boshlash kerak? ELLE O‘zbekiston tahririyati sizga o‘zingizni anglash yo‘lida dastlabki qadamlarni qo‘yishingizga yordam beradigan bir nechta amaliy tavsiyalarni taqdim etadi.
Hayotiy qadriyatlarni anglash
O‘zni muvaffaqiyatli anglash uchun dastlabki maqsadlarni belgilashda qaysi hayotiy qadriyatlar siz uchun ustuvor ekanligini tushunish muhimdir. Bu masalada faqat o‘z fikringizga tayanish va o‘zingizga nisbatan halol bo‘lish juda muhim, chunki butun yo‘lingiz aynan shunga bog‘liq bo‘ladi.
Agar hozir siz uchun nima qadrli ekanligini tushunishga qiynalsangiz, sizga yordam beradigan oddiy mashq bor. Bu usulni mashhur psixoterapevt Jeyson Luoma o‘z mijozlariga o‘zlarini yaxshiroq tushunishlariga ko‘maklashish uchun batafsil tasvirlab bergan.
Tasavvur qiling, siz to‘qson yoshdan oshdingiz, uzoq va baxtli umr ko‘rdingiz, endi esa mashhur jurnalist sizdan suhbat olish uchun keldi. Unga nima haqida gapirib bermoqchisiz? Nima sizga quvonch keltirdi? Qaysi paytlarda o‘zingizdan faxrlandingiz? Hayotingiz haqida so‘zlab berishdan mamnun bo‘lishingiz uchun u qanday bo‘lishi kerak? Fikr yuritib ko‘ring va bu savollarga samimiy javob yozing. Ushbu hikoyada siz uchun eng muhim bo‘lgan narsalarga e’tibor bering, so‘ngra asosiy qadriyatlarni ajratib ko‘rsating.
Fotо: Pinterest
Kuchli tomonlarni o‘rganish va tahlil qilish
Siz uchun eng ahamiyatli narsani aniqlab olganingizdan so‘ng, o‘zingizni ro‘yobga chiqarish uchun qanday imkoniyatlarga ega ekanligingizni tushunishingiz zarur. Bunda yaqinlaringiz yordam berishi mumkin: ulardan sizdagi qaysi fazilatlarni ko‘proq qadrashlarini so‘rang, shaxsiyatingizda nimani noyob va betakror deb bilishlarini aniqlang. O‘zingizni muvaffaqiyatli namoyon etish uchun sizga nima yetishmasligi mumkinligi haqida ham o‘ylab ko‘ring: bu bilim yoki ko‘nikmalar bo‘lishi mumkin, barchasi siz o‘zingizni ro‘yobga chiqarmoqchi bo‘lgan sohaga bog‘liq. Bu bosqichda istaklaringizni amalga oshirish uchun hozirning o‘zida nimaga ega ekanligingizni va nimani takomillashtirish kerakligini anglash muhimdir.
Harakatlar rejasini tuzish
Orzu qilish juda yoqimli va muhim, ammo ba’zida amaliyotga kelganda, qo‘yilgan maqsadlar juda ulkan va amalga oshirib bo‘lmaydigandek tuyuladi. Ishonchsizlikni yengish uchun maqsadlaringizni erishsa bo‘ladigan kichik qadamlarga ajrating. Masalan:
- agar o‘z biznesingizni yuritmoqchi bo‘lsangiz, boshqa tadbirkorlarning tajribasini o‘rganishdan boshlang;
- agar ijodiy karyera qilishni orzu qilsangiz, mahorat darsiga yoziling yoki o‘z qo‘lingiz bilan biror narsa yaratishga urinib ko‘ring.
Bunday yondashuv barcha sohalarda ishlaydi, faqat kasbiy sohalardagina emas. O‘zini namoyon etish ehtiyoji munosabatlarda, jamiyatda, oilada ko‘rinishi mumkin. Orzuingizdagi hayotni qurish uchun istalgancha sohani qamrab olishingiz mumkin.
Fotо: Pinterest
Foydali odatlarni joriy etish
Muvaffaqiyatsizlik qo‘rqinchi – o‘zlikni namoyon etishning asosiy g‘animi. Esda tutingki, har bir xato sizni kuchliroq qiladigan tajribadir.
Har qanday odatni 21 kunda shakllantirish mumkinligi haqida eshitgan bo‘lishingiz tabiiy. Aslida, bu, albatta, afsonadir, lekin unda haqiqat ulushi bor: agar har kuni o‘zingiz uchun muhim bo‘lgan ishga vaqt ajratsangiz, unda asta-sekin o‘sib borasiz.
Yarim yil davomida har kuni maqsadingiz bilan bog‘liq kichik vazifalarni bajarishga harakat qiling. Masalan, agar gap ijod haqida ketayotgan bo‘lsa, kundalik jadvalingizni shunday tuzingki, har kuni yarim soat rasm chizishga vaqt ajrating. Eng muhimi, buni o‘zingiz uchun qilayotganingizni unutmang. O‘zingiz sezmagan holda ishonchsizlik orqaga chekinadi va siz tobora yuqoriga ko‘tarila boshlaysiz.
Kichik muvaffaqiyatlarni nishonlash
O‘zlikni anglash nafaqat natija, balki jarayon hamdir. Yutuqlaringizni, hatto eng kichik yutuqlaringizni ham payqashni va har bir g‘alabangizdan quvonishni unutmang.
