O‘zlikning eng yuksak talqinini izlab
Shaxsiy rivojlanish va yuksalish izlaganlarning har biri o‘qishi lozim bo‘lgan kitoblar
Kitoblar o‘z-o‘zini rivojlantirish va shaxsiy o‘sish yo‘lidagi eng yaxshi yo‘l ko‘rsatuvchilardan biridir. Ular ilhomlantiradi, yo‘naltiradi va foydali odatlarni shakllantirishdan tortib hayotning ma’nosini izlashgacha bo‘lgan muhim savollarga javob beradi. ELLE O‘zbekiston tahririyati o‘zingizda ishonch hosil qilish, qiyinchiliklarni yengish va kundalik hayotda uyg‘unlikni topishga yordam beradigan nashrlar to‘plamini tayyorladi.
“Odat kuchi” Charlz Daxig
Bu odatlarimizning qanday shakllanishi va hayotimizni boshqarishi haqidagi qiziqarli tadqiqotdir. Muallif biz nima uchun qilayotgan ishimizni bajarishimiz va odatiy qoliplarni o‘zgartirish orqali shaxsiy va kasbiy muvaffaqiyatga erishish mumkinligini tushuntiradi. Kitobda odatlar hayotimizni qanday shakllantirishi va maqsadlarga erishish hamda o‘zimizning yangi qiyofamizni yaratish uchun ularni qanday o‘zgartirishimiz mumkinligi tushuntiriladi.
“Ertaga qoldirma” Brayan Treysi
Muallif ustuvorliklarni belgilash, o‘z vazifalarini nazorat qilish va asosiy ishlarga ulgurish uchun yordam beradigan oddiy, ammo samarali tizimni taklif etadi. Bu kitob kechikishga qarshi kurashish va vaqtni samarali tashkil etish bo‘yicha qo‘llanma: u orzularni haqiqiy yutuqlarga aylantirib, ayni damda harakat qilishni o‘rgatadi.
“Atom odatlar” Jeyms Klir
Kitob katta natijalarga olib keladigan kichik o‘zgarishlarni yaratish bo‘yicha bosqichma-bosqichli yo‘riqnomani taqdim etadi. Muallif foydali odatlarni shakllantirish, zararli odatlardan xalos bo‘lish va hayotni o‘zgartirish uchun kichik qadamlar kuchidan qanday foydalanishni tushuntiradi. Bu kitob barqaror muvaffaqiyat va shaxsiy o‘sish uchun sizning rejangizga aylanadi.
Fotо: Pexels
“Tong sehri” Xel Elrod
Tongni to‘g‘ri tashkil etish - bu har kuni to‘laqonli yashash yo‘lidir. Shuning uchun muallif aynan ertalabki odatlar hayotingizni tubdan o‘zgartirishi mumkinligini ta’kidlaydi. Kitobda erta turishning oddiy, ammo kuchli usuli, o‘zingiz uchun vaqt ajratish va muvaffaqiyatga erishish, uyg‘unlikni topish hamda sermahsul bo‘lishga yordam beradigan oltita qadam taklif etilgan.
“Hayot ma’nosini izlab” Viktor Frankl
Bu inson ruhining qudrati haqida teran ma’noga ega kitob. Muallif shaxsiy tajribasidan kelib chiqib, eng og‘ir sharoitda ham inson hayotning ma’nosini topishga qodir ekanligini ko‘rsatadi. Frankl qiyinchiliklarni yengishga va har bir lahzaning qadriga yetishga yordam beradigan logoterapiya falsafasi bilan o‘rtoqlashadi. Bu kitob hayotga bo‘lgan qarashni o‘zgartiradi.
