Ortiqcha yuklarsiz chiroyli ta’til: yo‘lga nimalarni olish kerak
Dam olishga go‘zallik sumkachasini qanday yig‘ish mumkin – ortiqcha buyumlarsiz, ammo aql bilan
Ta’tilga jomadon yig‘ayotganda, kosmetika tanlashga oqilona yondashish ayniqsa muhim: cheklangan joy, iqlim o‘zgarishi va kun tartibi odatiy go‘zallik tartibini qayta ko‘rib chiqishni talab qiladi. O‘zingizni qulay his qilish va tetik ko‘rinish uchun faqat asosiy va ko‘p qirrali vositalarni olish yetarli. ELLE O‘zbekiston terini dam oldiradigan va ortiqcha kuch sarflamasdan tetik ko‘rinishga yordam beradigan ixcham, ammo samarali vositalar to‘plamini tayyorladi.
Yuz va tana uchun quyoshdan himoyalovchi krem
Mavsum va yo‘nalishdan qat’iy nazar, SPF ta’til kosmetikasidagi eng muhim vositadir. U terini fotoqarishdan, pigmentatsiya va kuyishdan himoya qiladi. Qulaylik uchun yengil teksturali – suyuq yoki purkaydigan turini tanlash ma’qul, ayniqsa faol dam olishni rejalashtirgan bo‘lsangiz.
Namlantiruvchi krem yoki gel
Samolyotda, quyoshda yoki noodatiy iqlimda teri namligini yo‘qotishi mumkin. Namlovchi vosita qulay va yangi ko‘rinishni saqlashga yordam beradi. Tarkib yengil, ammo to‘yingan bo‘lishi kerak: gialuron kislotasi, aloe yoki pantenol bilan.
Mitsellar suv yoki gidrofil moy
Bu mahsulotlar ko‘chada o‘tkazilgan kundan so‘ng pardoz va iflosliklarni tez va mayin tozalashga yordam beradi. Ular, ayniqsa, faol dam olish va changli yoki issiq hududlarga sayohat qilishda juda foydali.
Universal BB- yoki CC-krem
U tonal krem, parvarish va SPF (agar mavjud bo‘lsa) o‘rnini bosadi. Bunday mahsulot terini ortiqcha zo‘riqtirmasdan rangni tekislaydi – sayohat paytida kunduzgi ham, kechki pardoz uchun ham eng maqbul yechim.
Kremli rumyana yoki tint
Ko‘p qirrali vosita bo‘lib, uni yanoqlarga ham, lablarga ham, hatto qovoqlarga ham qo‘llash mumkin. U ko‘p joy egallamaydi va qisqa vaqt ichida yuzingizni tetiklashtiradi.
Kiprik uchun tush va qosh uchun qalam
Nigohni ifodali qiladigan minimal pardoz. Suvga chidamli turlarini tanlash ma’qul, ayniqsa, cho‘milish yoki yuqori namlik rejalashtirilgan bo‘lsa.
SPF tarkibli gigiyenik labbo‘yoq yoki balzam
Lablar ham quyosh va shamoldan himoyaga muhtoj. Namlantiruvchi balzam quruqlik va yoriqlardan, tarkibidagi SPF esa shamollashdan saqlaydi.
Kichik hajmli dezodorant va quruq shampun
Dush va sayr oralig‘ida tarovatni his qilish uchun. Sayohat shaklidagi dezodorantni kun davomida olib yurish qulay, quruq shampun esa, agar vanna xonasiga vaqt yoki doimiy kirish imkoniyati bo‘lmasa, sochni tezda yangilaydi va hajmini oshiradi.
Yuz va soch uchun niqoblar
Yuz uchun mato yoki gelli niqob va soch uchun namlantiruvchi niqob quyosh, dengiz suvi va sayrdan keyin tez tiklanishga yordam beradi. Teri uchun gialuron kislotasi, aloe, pantenol yoki niatsinamid, soch uchun esa shea yog‘i, argan moyi yoki keratin qo‘shilgan niqoblarni tanlash afzal: ular namlaydi, yumshatadi va sog‘lom ko‘rinishni qaytaradi.
Asosiy qoida – pardoz sumkasini ortiqcha to‘ldirmaslik. Ta’til – bu dam olish, shu jumladan teri uchun ham. Universal mahsulotlarni tanlang va esda tuting: sayohatda eng yaxshi pardoz bu tabiiy yorqinlik va tarovatdir.
