Orzudagi asal oyi: dunyodagi eng sara besh yulduzli mehmonxonalar ro‘yxati

Hayotdagi eng romantik davr – asal oyi qulaylik, shinamlik va baxt muhiti bilan yodda qolishi lozim. Buning uchun dunyoning eng hashamatli mehmonxonalari yangi turmush qurganlar uchun maxsus dasturlar tayyorlagan. Ular nafaqat yuqori sifatli xizmatni, balki er-xotinlik hayotining ilk quvonchli xotiralarini yaratish yoqimli bo‘ladigan xilvatgohni ham taklif etadi. Ushbu maqolada sizni eng mashhur yo‘nalishlar bo‘yicha 5 yulduzli mehmonxonalar to‘plami kutmoqda.

Soneva Fushi, Maldiv orollari

Asal oyining sinonimi hisoblangan Maldiv orollari o‘zining tiniq suv ustidagi hashamatli villalari, xilvatdagi bungalolari va abadiy yozi bilan mashhur. Soneva – eng sara ekologik hashamatli mehmonxonalardan biri bo‘lib, uning o‘rmonlar va sohildagi xususiy qarorgohlari mavjud. Yangi turmush qurganlarning ko‘ngil ochishlari uchun dunyodagi eng zo‘r g‘avvoslik, massaj va villa tomida yulduzlar ostida tunash imkoniyati taqdim etiladi.

Four Seasons Resort Bali at Sayan, Bali

Bali kurortlari sokin, ma’naviy asal oyi uchun juda mos keladi. Osma ko‘priklar va basseynli villalarga ega bo‘lgan o‘rmondagi noyob mehmonxona Ayung daryosi ustida joylashgan. Sholi terassalari orasida meditatsiya va yoga, o‘rmonda romantik kechki ovqatlar, suv ustidagi SPA pavilyonlari mavjud. Mehmonxona nafaqat dam olish uchun ajoyib dasturlarni, balki okean qirg‘og‘ida kichik to‘y tashkil etishni ham taklif qiladi.

Hôtel Plaza Athénée, Parij

Monten xiyobonidagi romantika timsoli, Eyfel minorasi manzarasi bilan. Parijning mumtoz asal oyini orzu qilayotgan oshiqlar uchun ayni muddao. Bu binoning har bir burchagida Uyg‘onish davri hukmron, oltin ustunlar va shohona bezaklar qasrdagi bal muhitiga olib kiradi. Eyfel minorasi ko‘rinishidagi nonushta, Mishlen yulduzli oshpazning restoranidagi kechki ovqat va xonadagi romantik fotosessiyalar sehrli taassurotlar bag‘ishlaydi.

Belmond Hotel Caruso, Amalfitana qirg‘og‘i

Dengizga qaragan mehmonxonaga aylantirilgan XI asr tarixiy saroyi. Qoya chetidagi cheksiz hovuz romantik ta’til uchun ideal joy. Shaharning antik me’morchiligi orasidagi eski boylik uslubidagi italyan ertagi tarix va madaniyat muxlislari uchun eng yaxshi tanlovdir. Qadimiy qayiqda qirg‘oq bo‘ylab sayr qilish, limon bog‘larida sham yorug‘ida kechki ovqat, sohilning ajoyib tabiati mehmonxonaning “Osmon va dengiz o‘rtasidagi jannat” shioriga to‘la mos keladi.

Burj Al Arab Jumeirah, Dubay

Afsonaviy “yelkan”, Birlashgan Arab Amirliklari hashamatining ramzi. VIP-ta’til muxlislari uchun klublarning xilma-xilligi, qimmatbaho mashinalar va hashamatli do‘konlar mavjud. Ajoyib xizmat, ikki qavatli turar joylar, shaxsiy xizmatkor, Fors ko‘rfaziga qaragan tomda kechki ovqatlar taqdim etiladi. Xususiy sohil, molekulyar oshxona va yangi turmush qurganlar uchun maxsus dastur unutilmas taassurotlar qoldiradi.