Qalbga yo‘l
Orzu qilishga undovchi hikoyalar
Har birimizda orzularimizni, quvonchimizni va samimiyatimizni asraydigan shaxsiyatimizning bir qismi – ichki bolakay yashaydi. Ba’zida u kattalar hayotining og‘irligi ostida bosib qolinadi, ammo asl baxt va o‘zlikni izlayotganimizda aynan unga qaytamiz. Psixoanalitik Karl Gustav Yung fikricha, bu arxetip bilan birlashish orqali inson ichki yaxlitlikka erishadi, hayot quvonchini qayta kashf etadi, orzu qilishni va o‘zini qabul qilishni o‘rganadi.
Bu filmlar bizga to‘laqonli hayot uchun juda muhim bo‘lgan fazilatlarni eslatadi. Har bir hikoya nafaqat ko‘zlarga quvonch bag‘ishlaydi, balki ichki bolakayingiz bilan aloqani saqlashning ahamiyati haqida o‘ylashga undaydi.
“Katta kichkina men” (2010)
O‘zlikni topish va bolalik orzulariga qaytish haqidagi ilhomlantiruvchi komediya-drama. Bosh qahramon Margo – muvaffaqiyatli, ammo qat’iyatli biznes ayoli bo‘lib, atrofdagi hamma narsani nazorat qilishga o‘rgangan. Bir kuni uning hayotiga kichkina qizaloq kirib keladi – bu uning 7 yoshli versiyasi bo‘lib, unutilgan orzularni, hayot quvonchini va haqiqiy istaklarni eslatadi.
“13 dan 30 ga” (2004)
Bosh qahramon Jenna Rink – tezroq katta va muvaffaqiyatli bo‘lishni orzu qiladigan 13 yoshli qizaloq. U tug‘ilgan kunida tilak tilaydi va ertalab 30 yoshli ayolning tanasida uyg‘onadi. Go‘yo orzusi ushalganday: nufuzli ishi, hashamatli kvartirasi bor, lekin nimadir to‘g‘ri emas... Asta-sekin qahramon muvaffaqiyatga erishish yo‘lida o‘zini, haqiqiy do‘stlarini va hayot quvonchini yo‘qotganini anglaydi. Endi u qaysi biri muhimroq ekanligini qayta o‘rganishi kerak: kasb yutuqlarimi yoki samimiylik, do‘stlik va sevgimi.
“Qalb” (2020)
Hayotning ma’nosi, orzular va lahzadan zavqlanish haqida ilhomlantiruvchi va teran animatsion film. Unda musiqachi Jo Gardnerning tasodifiy baxtsiz hodisadan so‘ng narigi dunyoga tushib qolishi va hayotini qayta tushunishi haqida hikoya qilinadi.
“Kichkintoy” (2000)
Bosh qahramon Rass Durits – muvaffaqiyatli, ammo haddan tashqari jiddiy imidj-maslahatchi bo‘lib, hayot quvonchini unutgan. Uning uyida sirli tarzda to‘ladan kelgan, mehribon va o‘ziga ishonchsiz 8 yoshli bola paydo bo‘lganda hamma narsa o‘zgaradi... Bu uning bolalikdagi o‘zi! Kichkintoy katta Rassdan juda ko‘ngli qolgan: axir u uchuvchi bo‘lishni, it boqishni va baxtli bo‘lishni orzu qilgandi. Endi bosh qahramon bir paytlar nimani orzu qilganini eslashi va aslida nima muhimligini tushunishi kerak.
“Tungi ertaklar” (2008)
Filmda bosh qahramon mehmonxonaning oddiy xodimi bo‘lib, to‘satdan jiyanlariga uxlashdan oldin aytib beradigan ertaklari haqiqiy hayotda ro‘y bera boshlaganini payqaydi. Ammo bir muammo bor – ertaklarni bolalar davom ettiradi va voqealar qanday rivojlanishini aynan ular hal qiladi.
