Safar chog‘i terini qanday parvarishlash kerak?
Go‘zallik bilan bog‘liq yo‘l qoidalari
Sayohat chog‘i teri uzoq parvozlar, turli mamlakatlardagi iqlim va harorat o‘zgarishi hamda suvning farqi bois ko‘p stressga uchrashi mumkin. Terimiz tiniqligini va porlab turish xususiyatini saqlab qolsin, desak, aynan safar chog‘i uni to‘g‘ri parvarishlashimiz darkor.
Parvarishni samolyotning o‘zidayoq boshlang
Birinchi qoida — doimiy namlikni ta’minlash. Samolyot salonidagi namlik odatda 20% dan oshmaydi, bu sharoitda esa teri namligini tez yo‘qotadi. Yo‘lda termal suv, namlantiruvchi sprey yoki spirtsiz yengil mist sizning ajralmas hamrohingiz bo‘lsin. Kremni quyuqrog‘ini tanlaganingiz yoki odatiy parvarish vositalaringiz qatoriga gialuron kislotasili zardobni qo‘shganingiz ma’qul. Bundan tashqari, organizmni namlantirish ham juda muhim: parvozning boshidan oxirigacha qultumlab suv ichishni unutmang.
fotо: Dupe
SPF’siz yurmang
Qaysi mamlakatga uchishingizdan qatʼi nazar, SPF filtrli kremni surtish kundalik parvarishning majburiy bo‘lagiga aylanishi kerak. Samolyotda ultrabinafsha miqdori yerdagidan ancha baland, shu boisdan parvoz oldidan SPF surtib, zarur bo‘lganda uni yangilab turish darkor.
Yuzni ortiqcha parvarishdan ham asrang
Sayohat taʼsiri kuchli bo‘lgan kislotalar, retinoidlar va faol moddalarining konsentratsiyasi yuqori bo‘lgan vositalarni qo‘llash uchun maqbul vaqt emas. Bazaviy to‘plamni: yengil tozalash vositasi, namlantiruvchi va quyoshdan himoyalovchi kremni qoldiring. Qolganidan esa voz keching. Bu qichishishning oldini oladi va terining yangi iqlimga oson moslashishiga imkon yaratadi.
fotо: Dupe
Terini quritib yubormasdan tozalang
O‘zga yurtlarda krandan qattiq suv oqishi mumkin, bu esa terini quritib, sezuvchanligini oshiradi. Shu boisdan yoningizda yumshoq gel yoki tozalovchi emulsiya, teringiz o‘ta sezuvchan bo‘lsa — mitsellyar suv bo‘lsin. Kichik layfxak: vositalar yordamida tozalab bo‘lgach, yuzingizni shisha yoki plastik idishdagi suv bilan chaying.
SOS-vositalardan iborat to‘plam
Uzoq safarga chiqqan bo‘lsangiz, quyidagi vositalarni sumkangizga solib oling: namlantirish darajasi yuqori bo‘lgan matoli niqob (parvozdan keyingi oqshomda ishlatish uchun), lab uchun balzam, ham qo‘lga, ham tirsaklarga va ham yuz terisining qurigan qismlariga surtish mumkin bo‘lgan universal oziqlantiruvchi krem.
fotо: Dupe
Kundalik parvarishingizni iqlimga moslashtiring
Issiq yurtlarga uchayotgan bo‘lsangiz, yengil gellar, flyuid va zardoblarga ixtiyor bering. Sizni sovuq yoki shamolli iqlim kutayotgan bo‘lsa, teringiz parvarishini oziqlantiruvchi kremlar, moylar, himoya balzamlariga ishonib topshirganingiz maʼqul.
Parvozdan so‘ng organizmga to‘laqonli uyqu va dam zarur bo‘ladi. Zero ana shu ikkisi terining holatiga bevosita taʼsir ko‘rsatadi. Manzilga uchib borishingiz bilan tiklanib olish, yangi joyga moslashish uchun taningizga vaqt bering va albatta teringizga alohida eʼtibor qarating.
