Selebriti uslubidagi pardoz: Gollivudning eng mashhur vizaj ustalari texnikasi

Yulduzlar pardoziga doim gard yuqmagan bo‘ladi: terisi porlab turadi, strelkalar maromiga yetkazib chizilgan bo‘ladi, ko‘zlari jozibador, lablari esa maftunkor ko‘rinadi Go‘yo mashhurlarning faqat o‘zlariga ma’lum bo‘lgan go‘zallik sirlari borday tuyuladi. Aslida, bunday natijaga uyda ham erishish mumkin. Buning uchun qizil yo‘lak mehmonlarining pardoz bilan bog‘liq kundalik odatlariga oid bir nechta qoidalarni bilsangiz kifoya.

Benuqson teri - pardoz uchun asos hisoblanadi. Shu bois, terini kuchli ta’sir qiluvchi vositalar bilan quritib yubormaslik va pH muvozanatini barqaror saqlash uchun avvalo parvarishga e’tibor qaratish lozim. Go‘zal pardoz siri - terini tonal kremga tayyorlashda. Tonal krem qat-qat bo‘lib ko‘chib tushmasligi va oksidlanmasligi uchun, undan oldin namlantiruvchi praymer surtish darkor. Praymer dastlab suyuq xaylayter bilan aralashtirilsa, o‘sha mashhur “glowing skin” samarasiga erishiladi. Yuz xuddi ichidan porlab turgandek ko‘rinadi, kamera esa bunday natijani yaxshi ko‘radi.

foto:  instagram \ @bellahadid

Yulduzlarning ko‘zlarni bo‘yash borasidagi tanlovlari har xil bo‘lsa-da, aynan ko‘z pardozi Gollivud olamida asosiy urg‘u hisoblanadi. Masalan, Bella Hadid “tulki ko‘zlari” uslubini tanlaydi: uzaytirilgan strelkalar, chakka tomon cho‘zib surtilgan tenlar, tepaga taralgan qoshlar. Bu usul yuzni vizual ravishda tepaga ko‘taradi va nigohga “mushukcha nozik qarash” ifodasini beradi. Zendaya esa o‘zining bodomsimon ko‘z shaklidan kelib chiqib, bronza rang gammasidagi smoky-eyes pardozini afzal ko‘radi. Uning vizaj ustalari iliq qahvarangdan tillaranggacha bo‘lgan bir nechta bo‘yoqlarni uyg‘unlashtiradi. Bunday makiyaj yumshoq va ayni paytda hashamatli ko‘rinadi. Ariana Grande esa ko‘zlarni cho‘zadigan va nigohga noz-u ishva qo‘shadigan ingichka strelkalarga sodiq qolmoqda.

fotо: instagram \ @arianagrande

Qolgan masalalarda selebriti ikki guruhga bo‘lanadi. Birinchi guruhga konturing tarafdorlari kiradi. Bu uslubni Kim Kardashian jahon tendensiyasiga aylantirgan: to‘q rangdagi bo‘yoq yonoq ostiga, chakkaga jag‘ chizig‘i bo‘ylab surtiladi, yuz markazi bo‘lsa och rangdagisi bilan qoplanadi. Ikkinchi guruhga kiruvchilar “yosh ko‘rinish” ixlosmandlari sanaladi. Masalan, Kylie Jenner sovuq pushti rang bo‘yoqlarni yaxshi ko‘radi — bu bo‘yoqlar yoshartiradi va qiyofaga qo‘g‘irchoqsimon ko‘rinish beradi.

fotо: instagram \ @kyliejenner

Lab pardozida Hailey Bieber o‘zining Rhode brendi reklamasida tez-tez namoyish etadigan, lablarni katta ko‘rsatadigan usul tobora ommalashmoqda. Avval lablar atrofi biroz to‘qroq qalam bilan yurgizib chiqiladi, so‘ngra jilosiz lab bo‘yog‘i surtiladi. Lablar o‘rtasiga esa hajm berish uchun bir tomchi yaltiroq bo‘yoq surtiladi. Bu usul lablarni shishirib, maftunkorlik baxsh etadi.

fotо: instagram \ @haileybieber

Selebriti uslubidagi pardoz - bu doim ham qimmatbaho kosmetika degani emas. Bu - “Oscar”ga munosib qiyofa yaratishingiz mumkin bo‘lgan va ishonch hissini beradigan texnika degani. Yulduzlar yaxshi bilishadi: qizil yo‘lakdagi eng katta bezak — bu xarizma. Kosmetika esa faqat qalbdan taralayotgan nurni yorqinroq ko‘rsatib beradi, xolos.