Versace Prada kiymoqda: Prada Group tarixi va qudrati

Prada haqida gapirganimizda, biz ongli modani, bichim va kiyim orqali falsafa bilan ifodalangan sokin hashamatni tasavvur qilamiz, bunda uslub namoyish emas, balki bayonotdir. Ammo bu nom ortida ko‘proq narsa yashiringan – bu hashamat, tarix va dadil qarash uyg‘unlashgan ko‘p qatlamli tizimdir.

Prada kompaniyalar guruhiga kiruvchi brendlar:

Prada

1913-yilda Mario Prada tomonidan asos solingan asosiy brend. Dastlab brend sayohat sumkalari va jomadonlari ishlab chiqaruvchisi bo‘lgan va 1919-yilda rasman qirollik saroyining ta’minotchisiga aylangan. O‘nlab yillar davomida brend ko‘plab o‘zgarishlarni boshdan kechirdi, ammo asosiy burilish 1978-yilda, Marioning nabirasi Miuccia Prada kompaniyani boshqarganida sodir bo‘ldi. Aynan u nafaqat brendning rivojlanish yo‘nalishini, balki moda tushunchasini ham tubdan o‘zgartirdi. Miuccia Prada’ni charm atelyesidan aqliy platformaga aylantirdi: vazmin, kinoyali, tahliliy. Bugungi kunda Prada dunyodagi eng nufuzli brendlardan biri bo‘lib, modaga emas, balki ma’noga qarab estetika yaratadi.

FOTO: INSTAGRAM/PRADA

Miu Miu

1993-yilda o‘sha Miuccia Prada tomonidan yaratilgan brend. Bu uning bolalikdagi laqabi – Miu Miudan kelib chiqqan nom bilan podiumga olib chiqilgan yorqin va jasur “men”i edi. U Prada qat’iylik va vazminlik haqida ekanligini tushunardi, lekin uning to‘g‘ridan-to‘g‘ri va keskin xarakteri boshqa narsani talab qilardi: ko‘proq jasorat, hatto impulsivlik. Miu Miu bugungi kunda uslubni o‘z kayfiyatiga moslashtirishni yaxshi ko‘radigan har bir kishi uchun mashhur brendga aylandi.

FOTO: INSTAGRAM/MIU MIU

Church’s

1873-yilda Tomas Church tomonidan asos solingan, Britaniya ildizlariga ega qo‘lda tikilgan poyabzal brendi. Church’s – bu yuqori darajadagi ingliz etikdo‘zlik san’atining ramzi: eng sifatli materiallar, qat’iy uslub, ko‘p yillik chidamlilik. 1999-yilda Prada Group hunarmandchilik an’analarini saqlab qolgan holda, yangi modellar, urg‘ular, qiziqarli hamkorliklar orqali zamonaviy qarash va yechimlarni qo‘shib, Church’s kompaniyasini sotib oldi. Shunday qilib, Prada Group yordamida Church’s brendi klassika tarafdori bo‘lib qoldi, ammo davr kabi moslashuvchan bo‘lishni o‘rgandi.

FOTO: INSTAGRAM/CHURCH'S

Car Shoe

1963-yilda Gianni Mostile tomonidan asos solingan brend bo‘lib, u bizga haydashda qulaylik yaratish uchun rezina tishli ramziy tagcharmni taqdim etgan. Car Shoe brendining mokasinlari avtomobillar va poyabzal mahoratiga bo‘lgan ishtiyoq tufayli paydo bo‘lgan abadiy aksessuarga aylandi. Brend poyabzallari bugungi kungacha beparvo nafislik ramzi bo‘lib kelmoqda, chunki ularni avtomobil ishqibozlari ham, estetlar ham kiyishadi. Car Shoe brendi 2001-yilda Prada Group tarkibiga kirdi va bu brendga premium va estetika nuqtayi nazaridan yangi bozorlar va darajalarga chiqish imkonini berdi.

FOTO: INSTAGRAM/CAR SHOE

Marchesi 1824

Hayot tarzi estetikasi olamida o‘z ta’sirini oshirish uchun Prada Group Milandagi eng qadimgi kafelardan biri bo‘lgan Marchesi 1824 qandolat brendi nazorat paketiga ega bo‘ldi. Marchesi kompaniyasi har doim nozik didning sinonimi bo‘lib kelgan va Prada Group’ning bir qismiga aylanib, uslub nafaqat kiyinishingiz, balki ertalabki qahvangizni qanday ichishingiz bilan ham bog‘liqligini isbotladi. Brendning har bir o‘rami – san’at asari, shirinlik esa – vizual zavqning davomi. Marchesi 1824 – gastronomiya va moda, tarix va zamonaviy tendensiyalar o‘rtasidagi zamonaviy ko‘prik.

FOTO: INSTAGRAM/MARCHESI 1824

Luna Rossa

Hayot uslubiga kirishni davom ettirgan holda, Prada Group sportga murojaat qildi va 1997-yilda texnologik estetika belgisi va Prada atir liniyasi uchun ilhom manbai bo‘lgan Luna Rossa yelkanli jamoasiga asos soldi. Loyiha tashabbuskori har doim yaxta ishqibozi bo‘lgan Miuccia Pradaning turmush o‘rtog‘i Patrizio Bertelli edi. Jamoa yelkanli sportning eng nufuzli musobaqasi – America’s Cup’da ishtirok etish uchun maxsus tashkil etilgan. Keyinchalik, Luna Rossa xuddi shu nomdagi erkaklar atirlari kolleksiyasida o‘z aksini topdi: flakonlar yelkanli konstruksiyalar shakliga ishora qiladi, kompozitsiyalarning o‘zi esa musaffolik, tezlik va okean kuchini ifodalaydi.

FOTO: INSTAGRAM/LUNA ROSSA PRADA PIRELLI TEAM

Xulosa o‘rnida shuni aytish mumkinki, Versace ishonchli qo‘llarda bo‘ladi: Prada Group – bu kompaniya qanday qilib turlicha bo‘lishi va shu bilan birga yaxlitlikni saqlab qolishi mumkinligiga misol. Tuzilma ichidagi har bir brend o‘ziga xosligiga ega, mustaqil ravishda rivojlanadi, ammo shu bilan birga Prada Group tomonidan taqdim etilgan ta’sirchan imkoniyatlardan foydalanadi.

Jahon podiumlaridan tortib qandolatchilik durdonalarigacha – Prada Group kompaniyalar guruhi butun ekotizimni qurmoqda, unda moda, did, shakl va uslub yagona madaniy ifodaga birlashadi.