Yoshlikdan o‘zlashtirish kerak bo‘lgan odatlar

Yoshlik – bu kundalik odatlar shakllanadigan davr. Keyinchalik bizning hayotimiz “me’yori”ga aylanadigan narsalar. Bu davrda oddiy, ammo samarali odatlarni o‘zlashtirish kelajakka foydali sarmoya hisoblanadi.

ELLE O‘zbekiston tahririyati imkon qadar ertaroq o‘zlashtirish kerak bo‘lgan sakkizta oddiy amaliyotni taqdim etadi. Mutaassibliksiz, “dushanbadan boshlab yangi hayot”siz – shunchaki o‘zingizga e’tiborliroq bo‘lish usuli sifatida.

Xarajatlar hisobini yuritish – o‘zingizga g‘amxo‘rlik qilish demak

Moliyaviy savodxonlik – bu tayanch hissi: ish haqi nimaga sarflanayotganini va nimalarga qurbi yetishini tushunishdir. Moneon, Spendee yoki hatto Telegram botlari kabi xarajatlarni sezdirmay kuzatishga yordam beradigan ilovalar mavjud. Ba’zida oddiy tizim ham yordam beradi: pulni “zarur” va “qolgan barcha narsalarga” bo‘lish va ikkinchisi uchun naqd pul saqlash. Banknotlar tugagach, cheklov o‘z-o‘zidan ishga tushadi.

Ongli ravishda ovqatlanish parhez tutish degani emas

Tana haqida g‘amxo‘rlik qilish cheklovlardan emas, balki kuzatishdan boshlanadi. Qaysi mahsulotlar sizni tetiklashtiradi? Nimadan keyin organizmda og‘irlik, nimadan keyin esa yengillik seziladi? Oqsillar, yog‘lar va uglevodlar muvozanatini tushunish uchun ilovada (masalan, FatSecret) bir necha hafta davomida ovqatlanishni kuzatib borishingiz mumkin. Ammo keyin ichki sezgingiz va tanangizni tinglashni o‘rganganingiz ma’qul.

Fotо: Unsplash

O‘zingizga g‘amxo‘rlik sifatida barqaror uyqu tartibi

Surunkali uyqusizlik odatiy holga aylanmaguncha deyarli sezilmaydi. Keyin esa diqqatni jamlash, kayfiyat, immunitet bilan bog‘liq muammolar boshlanadi. Nafaqat soatlar soni, balki muntazamlik ham muhim. Oddiy usullardan biri: o‘zingizga “kechki marosim” o‘ylab toping: dush qabul qilish, terini parvarish qilish, moychechakli choy ichish yoki kitob o‘qish. Shunda organizm uyquga tayyorgarlik ko‘rayotganini tushunadi. Barqarorlik har qanday trekerdan yaxshiroq ishlaydi.

Xohlamasa ham harakat qilish

Jismoniy faollik tananing ekrandan “qotib qolmasligi” uchun zarur. Do‘konga borish, oshxonada raqsga tushish, lift o‘rniga zinapoyadan chiqish – bularning barchasi foydali. Kuniga kamida 5-6 ming qadam yurish kerak. Kun davomidagi kichik harakatlar kamdan-kam, ammo shiddatli mashg‘ulotlarga qaraganda yaxshiroq natija beradi.

Fotо: Unsplash

Vazifalar ro‘yxati yordamida miyani bo‘shating

Axborot shovqini, muddatlar, shaxsiy masalalar – hamma narsa miyada bo‘lsa, nafas olish qiyinlashadi. Yozib qo‘ying. Qo‘lda yoki ilovada – Notion, Google Keep, qog‘oz kundalik. Bir kunlik qisqa ishlar ro‘yxati meditatsiyaga qaraganda xavotirni yaxshiroq kamaytirishi mumkin.

O‘ziga g‘amxo‘rlik qilish usuli sifatida tibbiy tekshiruvlar

Yiliga bir marta – unchalik tez-tez emas. Umumiy qon tahlili, D vitamini, B12, glyukoza, ferritin, zarurat bo‘lsa UTT. Sanaga bog‘lash mumkin - -masalan, tug‘ilgan kun yoki bahor boshlanishi. Shunda odat o‘zi haqida eslatib turadi.

Fotо: Unsplash

Telefondan dam olish – “haqiqiy dam olish” vaqti

Hatto haftada bir kecha ekransiz o‘tkazish ham kunni uzaygandek his qildiradi. “Detoks” qilish shart emas – shunchaki telefonni boshqa xonaga qo‘yish, sham yoqish, fikrlarni daftarga yozish yoki musiqa tinglash mumkin. Bunda Forest ilovasi yordam berishi mumkin – telefonni qo‘lga olmaguningizcha daraxt o‘sib boradi. Bu “tanlov”ni ko‘z oldingizga keltirish va odatiy skrollga tushib qolmaslikka yordam beradi.

“Yo‘q” deyish – va o‘zini oqlamaslik

Xushmuomalalik bilan rozi bo‘lish ko‘pincha ko‘ringanidan ko‘ra ko‘proq kuch talab qiladi. Keskin “yo‘q” deyish shart emas – darhol javob bermaslik ham mumkin. Masalan, “o‘ylab ko‘raman va ertaga aytaman” iborasi buning qanchalik zarurligini baholashga vaqt beradi. Vaziyat kelganda o‘zini oqlamaslik uchun bir nechta neytral, ammo aniq iboralarni oldindan o‘ylab qo‘yish foydali bo‘ladi.