Jozibali rasmga tushish sirlari
Kamera oldida o‘zingizni ishonchli his qilishning qanday yo‘llari bor?
Insonning tabiiy go‘zalligi va fotografning professional mahoratidan tashqari, fotogeniklik tushunchasiga kamera oldida o‘z obrazi va his-tuyg‘ularini boshqara olish qobiliyati ham yashiringan. Ta’sirli suratlarning siri esa, xoh u selfi bo‘lsin yoki professional suratga olish, o‘ziga bo‘lgan ishonchdadir.
Turli rakurslarni sinab ko‘ring
Kamera oldida to‘liq ishonchga erishish yo‘lidagi birinchi qadam – fotosuratlar uchun turli rakurslarni sinab ko‘rishdir. Shunday qilib, siz o‘zingizning “ustun” tomoningiz va pozangizni topishingiz mumkin. Bu portret yoki to‘liq bo‘y bilan tushilgan suratlar bo‘lishi mumkin. Eng muhimi, har xil variantlarni sinab ko‘rish va o‘zingizga mosini topishdir!
His-tuyg‘ularingizni ifoda eting
Ko‘pincha fotosuratlar orqali biz ma’lum bir holatni, sezgini yoki his-tuyg‘ularni ifodalashga intilamiz. Shuning uchun kamera oldida o‘z his-tuyg‘ularingizni dadil namoyon eting! Axir aynan ular suratlarni haqiqiy va betakror qiladi.
Fotо: Freepick
Ko‘zlaringiz bilan tabassum qiling
“Smayzing” yoki ko‘zlar bilan tabassum qilish – bu lablaringiz harakatisiz ham, ko‘zlaringiz quvonchni ifodalaydigan texnikadir. Tayra Banks "Amerikacha top model" teleko‘rsatuvida o‘rgatganidek: ko‘zlar ostida kichik yostiqchalar hosil qilish uchun biroz ko‘zlarni qisish kerak. Bu usul nigohingizni yanada ifodali va o‘ziga xos qiladi.
Qomatingizni tik tuting
Qomatingizni to‘g‘rilang, yelkalaringizni yoying, o‘zingizni bir oz orqaga tashlang – barchasi tayyor! Qomat – bu kayfiyat va his-tuyg‘ularni ifodalovchi tana tilidir. Tik qomat kishining atrofdagilarga ochiq munosabatda ekanligini va o‘ziga ishonchini ko‘rsatadi. Bundan tashqari, to‘g‘ri qomat gavdani vizual jihatdan balandroq va kelishganroq ko‘rsatadi.
O‘zingizni erkin tuting
Professional suratga olish jarayonlaridan oldin tinchlanish uchun bir necha marta chuqur nafas oling. Suratlarda taranglik ko‘rinmasligi uchun yelka, bo‘yin va yuzingizni bo‘shashtiring. Ohista nafas olish tabiiy va erkin ko‘rinishga erishishga yordam beradi.
Fotо: Freepick
Ushbu maslahatlarga amal qilsangiz, oddiy selfi yoki professional fotosessiya bo‘lishidan qat’i nazar, kamera oldida o‘zingizni dadil his qilasiz va suratga olish jarayonidan zavq olasiz. Eng muhimi: o‘zingizdek bo‘ling, shunda kamera sizning haqiqiy go‘zalligingizni aks ettiradi!
