THE NEW EAST
Shunday lahzalar bo‘ladiki, o‘zgarishlar asta-sekin, deyarli sezilmas tarzda sodir bo‘ladi. Keyin esa bir nuqta keladi va birdan ayon bo‘ladi: qarshimizda mutlaqo yangi voqelik turibdi. Bugun O‘zbekiston aynan shunday davrni boshdan kechirmoqda. So‘nggi yillar mamlakatning o‘ziga bo‘lgan qarashini ham, dunyoning unga qanday qaray boshlaganini ham o‘zgartirdi. Dizaynerlar, rassomlar, fotograflar, me’morlar va kreativ industriyaning boshqa vakillaridan iborat yangi avlod O‘zbekistonning zamonaviy vizual tilini shakllantirmoqda. Endi tarjimaga muhtoj bo‘lmagan tilni.
Aynan shuning uchun ELLE Uzbekistan’ning sentabr muqovasi The New East deb nomlandi. Men uchun The New East — bu geografiya emas. Va, albatta, Sharqni G‘arbga qarama-qarshi qo‘yishga urinish ham emas. Bu — yangi madaniy holat. Unda O‘zbekiston merosi faqat tarix sifatida mavjud bo‘lishdan to‘xtaydi. Ipak matolari va suzani, an’anaviy kashtachilik, hunarmandchilik usullari, me’morchilik va Buyuk Ipak yo‘lining ko‘p qatlamli tarixi mutlaqo yangi g‘oyalar uchun boshlang‘ich nuqtaga aylanmoqda. Biz buni Dildora Kasimova, SAADI, Lali, Mursak, J.Kim, Azukar Moreno, Moel Bosh, Zulfiya Sulton, Nigora Hashimova, Dilnoz, Liliya Dulat, Porso, Morobulsin kabi dizaynerlar ijodida, shuningdek, o‘z ildizlariga murojaat qilishdan qo‘rqmaydigan, ammo ular haqida bugungi kun tilida so‘zlaydigan yangi avlod mualliflari — No.Sugar, Cherry Mx, M.Marjona — paydo bo‘layotganida ko‘ramiz.
Bu harakat moda doirasidan ancha tashqariga chiqmoqda. Bugun O‘zbekistonda yangi madaniy infratuzilma shakllanmoqda, zamonaviy san’at rivojlanmoqda, Toshkent o‘zgarmoqda, xalqaro e’tibor esa tobora ko‘proq Buxoroga qaratilmoqda. Mintaqadagi rassomlar, dizaynerlar, fotograflar va boshqa ijodkorlar global madaniy muloqotning bir qismiga aylanmoqda. Qaysidir ma’noda ushbu son muqovasining o‘zi ham The New East g‘oyasining aksiga aylandi. Biz uni o‘nlab yillar davomida jahon modasi tilini belgilab kelgan shaharlardan biri — Milanda suratga oldik. Kadrda — o‘z tarixi va mahorat an’analariga ega italyan Moda uyi Loro Piana. Muqovamiz qahramoni esa O‘zbekistondan. Menga bu ikki dunyoning uchrashuvi yoqadi. Qarama-qarshilik sifatida emas, balki mutlaqo tabiiy muloqot sifatida. Chunki zamonaviy moda allaqachon faqat bitta poytaxtga, bitta madaniyatga yoki bitta yo‘nalishga tegishli bo‘lishdan to‘xtagan. Bugun esa O‘zbekistonning bu muloqotda qanday o‘rin egallay boshlayotganini kuzatish men uchun ayniqsa qiziq.
Shu bilan birga, biz uchun faqat tashqariga emas, mamlakat ichiga ham qarash muhim — uning madaniyati, odamlari va hikoyalarini yanada diqqat bilan ko‘rish, yangi nomlarni kashf etish va ularga o‘z ovozini namoyon etish uchun makon yaratish. Va, ehtimol, eng muhimi — O‘zbekiston o‘z hikoyasini kimdir boshqa birov aytib berishini kutib o‘tirmasligi kerak. Bu hikoyani o‘zimiz aytishimiz mumkin.
ELLE Uzbekistan’ni yaratganimizda, biz uchun uning shunchaki O‘zbekistonda nashr etiladigan xalqaro jurnal bo‘lib qolmasligi muhim edi. Men uning O‘zbekiston iste’dodlari mamlakat chegaralaridan ancha uzoqda ham ko‘rinishi mumkin bo‘lgan platformaga aylanishini istadim. Buyuk jahon Moda uylari nomlari yonida O‘zbekiston dizaynerlarining nomlari ham paydo bo‘lishini istadim. Mamlakatimiz fotograflari, modellari, rassomlari va kreativ jamoalari xalqaro industriyaning bir qismiga aylanishini istadim. Zamonaviy O‘zbekistonni ELLE sahifalarida biz uni qanday kashf etayotgan bo‘lsak, shunday ko‘rishlarini istadim: jasur, intellektual, go‘zal, ziddiyatli, yosh va doimo o‘zgarib borayotgan.
The New East — bu eski Sharqning yangi versiyasi emas. Bu o‘z tarixini biladigan, ammo kelajagi qanday bo‘lishini o‘zi belgilaydigan Sharq. Va menimcha, dunyo uni endigina chinakamiga kashf eta boshlamoqda.
Fotograf: Dima Kutsenko
Model: Nora Isayeva (Fashion Model Management)
Stilist: Tanya Tuka
Makiyaj va soch turmagi: Ildana Xalitova
Kreativ direktor: Natasha Kasatkina
