Retinol: yorqin teri siri

Ushbu faol modda terini butunlay o‘zgartirish qobiliyati bilan mashhur bo‘lib, unga silliqlik, yorqinlik va tarovat baxsh etadi. Retinol ajinlar, pigmentatsiya, nursizlik va hatto akne bilan kurashishga yordam beradi, bu esa uni haqiqiy universal vositaga aylantiradi.

Agar retinolni o‘z parvarish tartibingizga qo‘shish haqida uzoq vaqtdan beri o‘ylab yurgan bo‘lsangiz yoki uning afzalliklari va qo‘llash xususiyatlari haqida ko‘proq bilishni istasangiz, unda ushbu maqola sizga retinol qanday ishlashi, kimga mos kelishi va qanday natijalarni kutish mumkinligini tushunishga yordam beradi.

Foto: Pexels

Retinol nima?

Retinol – bu teri, ko‘rish va immunitet tizimi salomatligi uchun zarur bo‘lgan A vitaminining bir shakli. Kosmetologiyada u hujayralar yangilanishini tezlashtirish va kollagen ishlab chiqarishni rag‘batlantirish qobiliyati tufayli qadrli. Bu modda ko‘plab qarishga qarshi va oqartiruvchi vositalar uchun asos hisoblanadi.

Asosiy afzalliklari:

• Ajinlarni tekislash. Retinol kollagen sintezini rag‘batlantiradi, bu terini yanada elastik va silliq qiladi.
• Akne bilan kurashish. U poralar tozalanishiga, yallig‘lanishni kamaytirishga va terini yog‘ ishlab chiqarishini tartibga solishga yordam beradi.
• Pigmentatsiyani bartaraf etish. Retinol pigment dog‘larini oqartiradi va teri rangini tekislaydi.
• Terini yangilash. Hujayra yangilanishining tezlashishi tufayli teri yanada tetik va yorqinroq ko‘rinadi.

Retinol kimga mos keladi?

Retinolni deyarli barcha teri tuzilishi va tashqi ko‘rinishini yaxshilashga intilayotganlar qo‘llashi mumkin. Biroq, ba’zi nozik jihatlar bor:

• Yosh. Retinol ko‘pincha 25-30 yoshdan boshlab, birinchi yosh o‘zgarishlari paydo bo‘lganda tavsiya etiladi.
• Teri turi. U ko‘pchilik teri turlari uchun mos keladi, ammo quruq va sezgir teri yumshoqroq formulalarni talab qiladi (masalan, retinil palmitat).

Foto: pexels

Retinoldan qanday to‘g‘ri foydalanish kerak?

• Oz miqdordan boshlang. Teringiz ko‘nikishi uchun mahsulotni haftasiga 1-2 marta qo‘llang.
• Kechqurun surting. Retinol terini quyosh nurlariga sezgir qiladi, shuning uchun ertalab albatta quyoshdan himoya kremini qo‘llash lozim.
• Kuchli ta’sir etuvchi vositalar bilan birga ishlatmang. Retinol bilan bir kunda kislotalar yoki boshqa faol moddalarni qo‘llamang.

Ehtimoliy nojo‘ya ta’sirlar

• Dastlabki haftalarda terining qurishi va po‘st tashlashi.
• Noto‘g‘ri qo‘llaganda qizarish va ta’sirlanish.
• Quyoshga nisbatan sezgirlikning ortishi.

Kimlar retinoldan voz kechishlari kerak?

foto: pexels

Homilador va emizikli ayollarga retinoldan foydalanmaslik tavsiya etiladi, chunki uning homilaga ta’siri yetarlicha o‘rganilmagan. Shuningdek, agar sizda juda sezgir teri yoki aknening og‘ir shakllari bo‘lsa, dermatolog bilan maslahatlashib olishingiz lozim.

ELLE O‘zbekiston tahririyati tavsiya etgan retinol tarkibli eng yaxshi 3 ta mahsulot:

1. Yangi foydalanuvchilar uchun

Agar siz retinolni birinchi marta ishlatayotgan bo‘lsangiz, past konsentratsiyali (0,1-0,3%) vositalarni tanlang va ularni parvarish tartibingizga asta-sekin qo‘shib boring. Bunday yondashuv teriga kuchli ta’sirlarsiz faol moddaga ko‘nikish imkonini beradi.

The Ordinary Retinol 0.2% in Squalane

Skvalan asosidagi formula quruqlik va qizarishni kamaytirishga yordam beradi. Bir kun oralab kechqurun oz miqdorda qo‘llang, asta-sekin chastotani oshirib boring. Ertalab SPF vositalaridan foydalanishni unutmang.

2. Sezgir teri uchun

Sezgir teri alohida ehtiyotkorlikni talab qiladi. Bu holda keramidlar, aloe yoki niatsinamid kabi tinchlantiruvchi moddalar qo‘shilgan yumshoq formulalar mos keladi.

La Roche-Posay Redermic R

Tarkibida past konsentratsiyadagi retinol va ta’sirlanishni kamaytiruvchi antioksidantlar mavjud. Qizarish xavfini kamaytirish uchun namlantiruvchi krem bilan aralashtirib, haftasiga 2 marta qo‘llang.

3.Tajribali foydalanuvchilar uchun

Ikki turdagi retinol qo‘shilgan mahsulotlar – bu tezkor va uzoq muddatli ta’sirni birlashtirgan innovatsion formulalardir. Ular ta’sir yumshoqligini saqlagan holda yanada sezilarli natijalarga erishish uchun samarali hisoblanadi.

Paula’s Choice Clinical 1% Retinol Treatment

Maksimal samara uchun retinol va yangi avlod retinoidini o‘zida mujassam etgan. Retinoldan tajribali foydalanuvchilar uchun mo‘ljallangan. Ko‘z atrofi sohasidan chetlab o‘tib, 2-3 kunda bir marta kechqurun qo‘llang.