Horological Machine: Bvlgari x MB&F

Bvlgari va MB&F soatning ikkinchi modeli ustida birgalikda ishlash natijasini namoyish etishdi. 2005-yildan beri MB&F (Maximilian Büsser & Friends) soat an’analarini qayta ko‘rib chiqib, bilak uchun uch o‘lchovli kinetik haykallar yaratmoqda. Mashina-soatlar brendning “do‘stlari” bilan hamkorlik tufayli dunyoga keladi va ilmiy fantastika, superkarlar va hayvonot dunyosi kabi turli mavzulardan ilhom oladi.

Bvlgari Group bosh direktori Jan-Kristof Baben shunday deydi: “Soatsozlik innovatsiyalar va istaklarni o‘z ichiga oladi, bu mikromexanikadagi ajoyib tajribaning kutilmagan va shu bilan birga hayratlanarli darajada vaqtga bo‘ysunmaydigan dizayn bilan sehrli qorishmasidan kelib chiqadi. Murakkab davrlarda brendlar, ayniqsa, yangi ufqlarni ochishlari va taraqqiyot, go‘zallik va kutilmagan tashabbuslarga undaydigan strategik fikrlashga chanqoq menejerlar va dizaynerlar rahbarligida misli ko‘rilmagan innovatsiyalarga jur’at etishlari kerak. Biz umumiy qadriyatlarga ega bo‘lgan MB&F bilan aynan shunga erishdik”.

Foto: Bvlgari matbuot xizmati

Bvlgari soatlarini yaratish bo‘yicha direktor Fabritsio Buanamassa Stilyani va MB&F asoschisi hamda ijodiy direktori Maksimilian Busser Bvlgari’ning eng mashhur tarixiy asarlaridan biri – 1948-yilda Bvlgari’da paydo bo‘lgan Serpentini qayta ko‘rib chiqishga va uni MB&F yuqori soatsozlik san’atining mexanik olamiga olib kirishga qaror qilishdi. Ikki ijodkorning qarashlari va tajribasini mujassam etgan Bvlgari x MB&F Serpenti aniq shakl-shamoyilga ega bo‘la boshladi.

Horological Machine soat mashinasi doirasida abadiy tiklanish va jasur o‘zgarishlar ramzi bo‘lgan Serpentini qayta ko‘rib chiqish muhandislik va mexanizm kontseptsiyasi, korpus dizayni va ijro nuqtayi nazaridan namunani qayta ishlab chiqishni talab etdi.

Foto: Bvlgari matbuot xizmati

“MB&F’da biz vaqtni ko‘rsatadigan kinetik haykallarga ixtisoslashganmiz, shuning uchun ta’riflash vazifasi bizniki edi. Shunga qaramay, soatning biomorf dizayni mexanizm kabi korpus borasida ham oldimizga ulkan vazifalarni qo‘ydi”, – deydi Maksimilian Byusser. “Murakkab korpus to‘liq 5 o‘qli 3D frezerlarida yaratilgan va beshta sapfir oynani o‘z ichiga oladi. Ular nafaqat ishlab chiqarish juda qiyin, balki korpusning egilgan shakli va 30 metr suv o‘tkazmasligini ta’minlash istagi tufayli o‘rnatish ham bir xil darajada murakkab edi”.

Mashinani ag‘darib, yurish zaxirasi ko‘rsatkichini, shuningdek, qo‘lda ishlov berilgan mexanizmning boshqa 310 ta qismidan ba’zilarini ko‘rish mumkin. MB&F soatsozlari oyiga faqat oltitadan sakkiztagacha Bvlgari x MB&F Serpenti mexanizmlarini ishlab chiqarishlari va yig‘ishlari mumkin; 99 nusxani yetkazib berish uchun bir yildan ko‘proq vaqt talab etiladi.

Foto: Bvlgari matbuot xizmati

Tanlov uchun har biri 33 nusxada cheklangan uch xil versiya taklif etiladi. Birinchisi ko‘k soat va daqiqa gumbazli 5-sinf titan korpusida, ikkinchisi o‘tkir yashil ko‘zlar va 18 karat pushti oltindan yasalgan korpusda, uchinchisi esa qora PVD qoplamali zanglamaydigan po‘latdan yasalgan va yorqin qizil ko‘zlarning jonli nigohi bilan bezatilgan.

MB&F va Bvlgari soat kolleksionerlarini sehrlashi aniq bo‘lgan innovatsion ilonni yaratish uchun kuchlarini birlashtirdilar.