Visa Fashion Week Almaty. Ikkinchi kun.
Visa Fashion Week Almaty’ning ikkinchi kuni bizni nima bilan hayratga solganini hikoya qilish va ko‘rsatishni davom ettiramiz. Yanada ko‘proq rang, harakat va madaniy kod.
Namoyishlarning ikkinchi kunini Pentatonica brendi ochdi. U ba’zan shakl rangdan ko‘ra muhimroq ekanligini namoyish etdi. Deyarli bir xil rangda ishlangan kolleksiyani tomosha qilgingiz kelardi: assimetrik etaklar, yenglardagi jim-jimalar va yengil ko‘rinishdagi ko‘p qatlamlilik.
Foto: Pentatonica / Raimonda Kulikauskiene
Next Designer Award 2025 tanlovining g‘olibi – Dmitriy Xalitov va Mariya Nesterova asos solgan Fournest brendi o‘zining ariza-kolleksiyasini taqdim etdi. Ko‘rsatuv global ekologik muammolar – tabiatning ifloslanishi, o‘rmon yong‘inlari, noqonuniy axlatxonalar va iqlim o‘zgarishi haqida hissiy bayonot bo‘ldi. Liboslardan tashqari, modellar tomoshabinlar bilan ma’noli mimika va og‘ir nigohlar orqali muloqot qilishdi. Ular niqoblar taqib, go‘yo samimiy va chuqur suhbatga chorlayotgandek edi.
foto: Fournest / Raimonda Kulikauskiene
Visa Fashion Week Almaty’ning ikkinchi kunidagi yorqin voqea mahalliy brendimiz AzukarMoreno kolleksiyasi bo‘ldi. U O‘zbekistonning quyoshli energiyasini mujassam etdi.
Ko‘rgazma rang-barang liboslar va raqslar bilan to‘lib-toshdi. Bu kiyim-kechak ichki energiya, milliy o‘ziga xoslik va chuqur ildiz otgan an’analarning ifodasi ekanligini anglatardi.
Marg‘ilonlik ustalar to‘qigan tabiiy matolardan foydalanish – brendning alohida faxri. Bu nozik ish zamonaviy dizayn va mahalliy hunarmandlar hamjamiyatini qo‘llab-quvvatlash o‘rtasidagi uyg‘unlikni yaratib, avlodlar aloqasini va mintaqamizning madaniy merosini saqlab qolmoqda.
foto: AzukarMoreno / Raimonda Kulikauskiene
Armanistonning MANUKALEKSANYAN brendi namoyishi ham esda qolarli bo‘ldi, ayniqsa marvarid, to‘g‘nag‘ich va murakkab bezak unsurlari bilan bezatilgan fakturali jaketlar e’tiborni tortdi. Dizayner o‘z mahsulotlarining teran mazmuni orqali armanlarning boy madaniyati va merosining go‘zalligini hikoya qilishga intilgan.
foto: MANUKALEKSANYAN / Raimonda Kulikauskiene
“Biz moda shunchaki kiyim emasligiga ishonamiz. Bu madaniyat tili, dunyo bilan muloqot va mamlakatning yangi qiyofasini shakllantirish vositasidir”, deydi Visa Fashion Week Almaty bosh direktori Bauirjan Shadibekov.
Aynan shu fikr ikkinchi kunning ruhini yanada aniq aks ettirdi: bu yerda moda nafaqat uslub haqida, balki ma’nolar, ildizlar va o‘ziga xoslik haqida so‘zlaydi.
