Haute Couture Week. 4-kun

Yuqori moda haftaligining so‘nggi kuni sermazmun moda marafonining yorqin qismiga aylandi. U nafaqat hayratlanarli to‘plamlari, balki kutilmagan performanslari bilan ham yodda qoldi. Germanier namoyishida mehmonlarni Hello Kitty va Kuromi personajlari brendning kastom obrazlarida kutib olishdi va liniyaning o‘zi rang, kinoya va telbalik portlashi sifatida namoyon bo‘ldi.

Jordan Rot ushbu haute couture mavsumini “Qat’iy go‘zallikning radikal harakatlari” deb nomlangan dadil chiqish bilan yakunladi. U teatr, moda va san’at o‘rtasidagi chegaralarni yo‘qotib, liboslarni o‘zlikni namoyon etish vositasiga aylantirdi. Uning Met Gala qizil gilamlaridan Thom Browne va Rahul Mishra podiumlarigacha bo‘lgan yo‘li o‘zgarishning timsoliga aylandi: yuqori modada u shunchaki libos emas, balki mavjudlikning yangi shakliga erishadi. Bunda har bir obraz shaxsiyat va go‘zallikning an’anaviy qoliplardan tashqaridagi namoyon bo‘lishidir.

Yuqori moda o‘zgarmoqda – bugun u nafaqat hashamat, balki erkinlik, ijodkorlik va o‘ziga xos bo‘lish jasorati to‘g‘risida ham. Yangi bosqich qanday bo‘lishini vaqt ko‘rsatadi, lekin hozirning o‘zidayoq aniq: dizaynerlarning shiddatli to‘lqini namoyishlar jadvalini qiziqarli, jonli va hissiyotlarga boy qilmoqda. Sizni 2025-2026-yillar kuz-qish mavsumining so‘nggi kutyur kunining yetakchi kolleksiyalari bilan tanishishga taklif etamiz:

ArdAzAei

Parijdagi sobiq Fondation Cartier binosida ArdAzAei o‘zining to‘rtinchi “Yig‘ilgan dengiz” kutyure to‘plamini taqdim etdi. Modalar uyi har bir burmasi va pardasi dengiz unsurlari ritmini eslatuvchi suv osti dunyosining go‘zalligi va nozikligi haqida fikr yuritdi. Dengiz ekotizimlariga ehtiyotkorlik bilan munosabatda bo‘lish ramzi bo‘lgan dengiz tipratikani markaziy timsolga aylandi. Yumshoq pushti, lavanda va pastel ranglar palitrasida dizayner ayollik va okean chuqurligini aks ettirdi. Korset ko‘ylaklaridagi plissirovkalar dengiz oqimlarini kesib o‘tish bilan hamohang, yengil mini-ko‘ylaklar esa yumshoq marjonlar kabi tebranadi. O‘n minglab Swarovski kristallari va munchoqlar bilan bezatilgan kechki liboslar ichkaridan bioluminessensiya bilan porlayotganga o‘xshaydi. Suv motivlari detallarda ham aks etgan: ipak makramedan tikilgan dengiz tipratikanlari ko‘ylakni o‘rab olgan, beshta hajmli plisse-yelpig‘ichdan iborat mini-yopinchiq esa ularning anatomiyasiga o‘xshaydi. Egilgan poshnali va metall detallarga ega poyabzalning ikki turi obrazlarning silliq arxitekturasini to‘ldiradi. To‘plamning yakuniy chiqishi suv harakati illyuziyasini yaratadigan gofrlangan gipyur qatlami ostida dengiz jonzotlari tasvirlangan organza bilan bezatilgan.

Rami Al Ali 

Rami Al Ali yuqori moda federatsiyasining rasmiy taqvimiga kirgan holda, “Nur qo‘riqchilari – Damashqning jonli hunari”ni taqdim etib, karyerasida yangi sahifa yaratdi. Bu to‘plam dizaynerning ijodiy ongi shakllanishiga turtki bo‘lgan Damashq shahriga shaxsiy ehtirom ifodasi edi. Eski shaharning me’moriy hashamatidan ilhomlanib, u o‘z vatanining yo‘qolib borayotgan hunarmandchilik an’analariga murojaat qiladi. To‘plam bir vaqtlar hayot bilan to‘lib-toshgan o‘ymakor eshiklar, naqshinkor shiftlar va yashirin hovlilarning go‘zalligini ulug‘laydi. Nafis siluetlarda saroy va masjidlarning tashqi ko‘rinishi aks etadi. Bu yerda kimxobdagi qo‘lda tikilgan kashta yaltiraydi, payetkalar sharq mozaikalarining ritmini takrorlaydi, munchoqlar esa sadaf naqshli bezaklarni ajratib turgandek tuyuladi. Har bir ko‘ylak va yopinchiq go‘yo tumorga aylanadi. Kiyimlar nafaqat estetik ifoda, balki madaniy meros timsoli ham bo‘lib qoladi. Ranglar jilvasi – olxo‘ri va atirguldan tortib oltingacha, moviy va oq marmar – xotiraning o‘zidek yorug‘lik va soyaga to‘la ranglarga burkangan.

Chochengco

Ilgari Chocheng nomi bilan tanilgan Chochengco brendi “Grossmeyster” to‘plami bilan o‘zini namoyish etdi. Ushbu to‘plam “ongli yuqori moda” g‘oyasini mujassam etgan bo‘lib, unda hashamatlilik yorqinlik bilan emas, balki falsafaning chuqurligi bilan belgilanadi. Har bir buyum Londonda faqat tabiiy va vegan materiallaridan – paxta buklidan tortib baxmalgacha qo‘lda tayyorlanadi. Dizayner Cho Cho Chen mo‘ynadan butunlay voz kechib, uni paxta organzasining me’moriy to‘lqinlari bilan almashtirdi. Ranglar majmuasi – fuksiya, lab bo‘yog‘i va magentaning o‘ziga xos ranglari – brendning kinematografik ruhiga ishora qiladi. Bu safar Vong Kar-Vayning ichki intizom va nozik hissiyot uyg‘unligi haqidagi “Buyuk usta” filmi ilhom manbai bo‘ldi. Shakl, faktura va rang ustida puxta ishlash orqali brend sharqona libos an’analarini qayta talqin etadi. Vizual she’riyat texnik mukammallik bilan uyg‘unlashib, xuddi art-haus kino tasmasidan chiqqandek obrazlarni yaratadi.

Cheney Chan 

O‘tgan mavsumda tomoshabinlarni maftun etgan dizayner Cheyni Chan Parijga o‘z taqdimoti bilan qaytib keldi. Uning liboslari chinakam san’at asari bo‘lib, yuksak mahorat, timsollar va kuchli tasviriy poetikaga ega.

“Yetti nafas” to‘plami qushning yetti hayotiy bosqichi haqidagi nozik kutoyr qissasidir. Ilk nafasdan to ramziy o‘limgacha – har bir obraz hayot siklining asosiy lahzasini aks ettiradi. “Tug‘ilish” qismida oppoq ranglar, par to‘shama fakturalar va nozik kashta hukmronlik qiladi. “Raqs” harakatga to‘la: matolar qadamlarga hamohang, metall elementlar esa teatral ifodaga ishora qiladi. “Parvoz”da yengil karkaslar va kanareyka patlarining taqlidi o‘rnatilgan bo‘lib, ular balandlikka ko‘tarilish hissini beradi. “Mudofaa”da kiyimlar himoya sovutini eslatadi – strazlar, qattiq to‘rlar va “qalqon” tuzilishi mavjud. “Ortiqchalik” to‘yingan matolar, kesimlar va burmalar bilan harakat qiladi. “Qo‘shiq”da ovoz ko‘p qatlamli kashta va grafik tuzilish orqali ifodalanadi. Siklni yakunlovchi “O‘lim”da esa kulrang-qora gammalardagi yemirilayotgan to‘rlar bilan bezatilgan obrazlar shaklning parchalanishi va yangi holatga o‘tishni ramziy ifodalaydi.

Germanier 

Kevin Jermanyening ishonchi komilki, moda nafaqat go‘zal, balki ilhombaxsh ham bo‘lishi lozim: oddiy, ammo sayoz emas; orzumand, ammo haqiqatga asoslangan. Uning yangi “O‘yinchilar” to‘plami quvonch, jasorat va rang-barang telbalikni namoyon etdi. Kolleksiya karnaval ruhini muhandislik ixtirochiligi bilan uyg‘unlashtirdi: havo sharlaridan tikilgan ko‘ylaklardan tortib, olov tillarini eslatuvchi erigan plastik idishlardan yasalgan haykaltaroshlik panellarigacha. Jermane butun dunyo bo‘ylab ekologik ongli dizaynerlar bilan hamkorlik qilib, chiqindilarni san’atga aylantirmoqda: masalan, Vyetnamda plastmassani qayta ishlab, kashta tikishmoqda, Braziliyada esa eski xaltalardan rafiya yasashmoqda. Qayta ishlangan yapon qog‘ozidan tikilgan nikoh libosi hamda Swarovski kristallari bilan bezatilgan va patli dubulg‘alar bilan to‘ldirilgan baykerlar kurtkalarini alohida ta’kidlash joiz.

Suratlar brendlarning JA-xizmatlari tomonidan taqdim etilgan.