Moda va adabiyot: Moda uylari qoshidagi mashhur kitob klublari

Bugungi kunda moda podiumlar va kiyim javonlari doirasidan ancha tashqariga chiqmoqda. Moda uylari millionlab insonlarga ilhom bergan holda ko‘rgazmalar, musiqiy hamkorliklar va, albatta, kitobxonlar klublariga ega bo‘lgan to‘laqonli madaniy muassasalarga aylanmoqda. Ha, shunday, dunyoning eng yirik fashion-brendlari butun jahon go‘zallik ixlosmandlari va ziyolilarini birlashtirgan holda, o‘z adabiy hamjamiyatlarini tashkil etmoqda.

fotо: Instagram / vanessarosales

CHANEL hamisha madaniyatga muhabbati bilan mashhur bo‘lgan. 2020-yilda brend CHANEL Book Club tashabbusini yo‘lga qo‘ydi, uning rahbari sifatida aktrisa va brend elchisi Margaret Qualley tanlandi. Klub a’zolari Virginia Woolfdan Joan Didiongacha bo‘lgan ayol mualliflarning asarlarini muhokama qilib, modada ham, adabiyotda ham ayol erkinligining, shaxsiy uslubi va faqat o‘ziga xos ovozi bo‘lishining muhimligini ta’kidlashadi. Uchrashuvlar kichik guruhlarda o‘tkazilsa-da, ularning onlayn translyatsiyalari mavjud, bu esa geografik joylashuvdan qat’i nazar, barcha ayollarga hamjamiyatga qo‘shilish imkonini beradi.

Dior mashhur Book Tote sumkasidan ilhomlanib, mutolaani yangi moda marosimiga aylantirdi. Bir vaqtlar klubni Maria Grazia Chiuri boshqarib, unga feministik adabiyotga bo‘lgan ishtiyoqini singdirgan edi. Bugungi kunda loyiha mustaqil hayot kechirib, kitoblar to‘plamini moda uyining mashhur elchilari va do‘stlari shakllantiryapti. Uchrashuvlar esa butun dunyo bo‘ylab - Parijdan Seulgacha bo‘lgan Dior do‘konlarida o‘tkazilib, har bir muhokama zamonaviy ijtimoiy tadbirga aylanmoqda.

fotо: Instagram / Marionberrin

Words and Wonders

Modaga eklektik yondashuvi bilan mashhur bo‘lgan Italiyaning Gucci uyi Gucci Equilibrium madaniy platformasi doirasida Words and Wonders loyihasini ishga tushirdi. Bu shunchaki kitob klubi emas, balki haqiqiy san’at muloqoti bo‘lib, kitoblar musiqa, kino va san’at nuqtayi nazaridan muhokama qilinadi. Tadbirlarda shoirlar, yozuvchilar, faylasuflar ishtirok etadi, muhit esa o‘tgan asrdagi bogema salonlarini eslatadi.

Bu nega muhim? 

Moda uylari huzuridagi kitobxonlik klublari — bu raqamli davrda mutolaani qo‘llab-quvvatlash usuligina emas, balki zamonaviy madaniy faollikning bir shaklidir. Ular moda nafaqat vizual jihatdan, balki ma’naviy jihatdan ham aql bilan yo‘g‘rilgan, teran hamda ilhombaxsh bo‘lishi mumkinligini ko‘rsatadi. Zero, bugungi kunda zamonaviy bo‘lish — kitobxon bo‘lish demakdir.

Agar shu paytgacha kitob klubini zerikarli yoki eskirgan narsa, deb o‘ylagan bo‘lsangiz, unga yangicha nigoh bilan qarash vaqti keldi. O‘ylab ko‘ring-a, balki sizning navbatdagi sevimli romaningizni aynan CHANEL yoki Gucci tavsiya qilar…