Nyud uslubidagi pardoz orqali namoyon bo‘lgan tabiiy go‘zallik

Nyud uslubidagi pardoz — hech qachon modadan chiqmaydigan betakror trend. Sababi esa oddiy: kosmetikaning vazifasi — tabiiy go‘zallikni bo‘yoqlardan hosil bo‘lgan niqob ortida yashirish emas, balki uni yanada ochib berish. Vizaj ustalari ana shu falsafadan ilhomlanib, nyud uslubini yaratganlar. “Nyud” atamasi “yalang‘och” ma’nosini anglatuvchi inglizcha nude so‘zidan olingan. Pardozda bu maksimal tabiiylikni anglatadi, ya’ni teri sog‘lom va parvarishlangandek ko‘rinadi, lablar yumshoq, ko‘zlar esa ifodali, biroq yorqin aksentlarsiz bo‘ladi. Nyudning asosiy g‘oyasi shundaki - pardoz bor, lekin u deyarli sezilmaydi.

Biroq ko‘pchilikda shunday holat kuzatiladi: nyud rangidagi lab bo‘yog‘i yoki tonal vosita yuzni so‘lg‘in, horg‘in va hatto jonsiz ko‘rsatadi.  Bunday holatning oldini olish uchun mazkur vositalar lablarning tabiiy rangi va terining asosiy rangi bilan mos tushishiga e’tibor qarating. Terining oltinsimon va shaftoli rangiga yaqin bo‘lgan iliq rangi karamel tusiga ega och jigarrang va terrakota ranglari bilan ajoyib uyg‘unlashadi. Pushti va ko‘kimtir tusga ega bo‘lgan sovuq rangdagi teriga bo‘lsa esa o‘ziga o‘xshash ranglar mos tushadi.

fotо: instagram \ @nikki_makeup

fotо: instagram \ @marinaruybarbosa

Nyud uslubidagi pardozning ikkinchi muhim elementi - bu terining tabiiy porlashidir, shuning uchun finishni tanlashda teksturalarning roliga past baho berish kerak emas. Nyud  uslubida jilosiz qilingan pardoz terining quruqligiga urg‘u berib, yuzni yana-da jiddiy ko‘rsatishi mumkin. Agar teri quruqlikka moyil bo‘lsa, kremli yoki satin teksturalarni tanlagan ma’qul. Yaltiroq jilolar va suyuq xaylayterlar esa, aksincha, yuzni tetiklashtiradi va qiyofaga mayinlik beradi. Bunday obrazda ham maksimal chidamlilik, ham qulaylikni taqdim etuvchi tintlar ayni muddao bo‘ladi.

fotо: instagram \ @jamesmolloymakeupartist

Ko‘zlar pardoziga alohida e’tibor qaratish lozim. Nyud uslubidagi makiyajda shaftoli rang, xira pushti rang, qahvarang va qum rangi kabi pastel tuslaridagi tenlar asqatadi. Bunday palitra hayotdagi barcha vaziyatlarga mos keladigan nozik va nafis obraz yaratadi. Aniq chiziqlar va qora strelkalar o‘rniga yumshoq jigarrang qalam va shu rangdagi tushni ishlatish tavsiya etiladi. Bu kipriklarga “dramatik” ko‘rinishsiz tabiiy hajm beradi. Qoshlarni gel bilan tarash yoki yumshoq qalam bilan urg‘u berishning o‘zi kifoya, bu nigohlarni ochadi. Ideal pardoz tayyor, pushti yoki shaftoli rang yog‘upa va lablar rangiga uyg‘un yoki bir-ikki ton to‘qroq yaltiroq lab bo‘yog‘ini surtishning o‘zi yetarli bo‘ladi.

fotо: instagram \ @nikki_makeup

Nyud pardozi allaqachon oddiy tabiiy obraz chegarasidan tashqariga chiqib bo‘lgan. Ranglar, teksturalar va urg‘ularning puxta o‘ylangan uyg‘unligi yuzni tetik va parvarishlangan ko‘rsatadi. Bugun bu shunchaki trend emas, balki go‘zallik sanoatining to‘laqonli yo‘nalishi bo‘lib, universalligi, yengilligi va tabiiy go‘zallikka urg‘u bera olish qobiliyati bois qadrlanadi.