Podiumda robot: TULASI va Omnia Vanitas namoyishi haqida nimalarni bilish kerak?
TULASI namoyishining yakunida podiumga odamsimon robot chiqdi. Sun’iy intellekt va raqamli moda bilan ishlaydigan britaniyalik dizayner Tulasi Parmar uchun bu tabiiy qadam edi. Biroq Omnia Vanitas kolleksiyasining asosida ancha qadimiy savol yotadi: nega bizni bir kun kelib yo‘q bo‘ladigan narsalar shu qadar o‘ziga tortadi?
Namoyish 20-sentabr kuni London moda haftaligi doirasida The Royal Horseguards mehmonxonasida bo‘lib o‘tdi. Kolleksiya nomi Voiz kitobidagi «Behudaliklar behudaligi, hammasi behuda» degan so‘zlarga ishora qiladi. Parmarni insonning go‘zallik, boylik va hokimiyatga bog‘liqligi qiziqtiradi. Ko‘p jihatdan egalik qilish istagi hisobiga yashaydigan moda olami uchun bu ayniqsa qiziqarli mavzu.
Ilhom manbalaridan biri Paolo Veronezening «Donishmandlik va kuch allegoriyasi» asari bo‘ldi. Dizayner talqinida nurga intilayotgan Donishmandlik timsoli dunyoviy boyliklar og‘irligi pastga tortayotgan Gerkulesga qarama-qarshi qo‘yiladi. Parmar bu voqeani bugungi kunga ko‘chiradi: endi inson tanasi bilan yonma-yon cheksiz o‘zgartirish, mukammallashtirish va yosh saqlash mumkin bo‘lgan raqamli qiyofa ham mavjud.
TULASI ortida Buyuk Britaniyada ulg‘aygan, kelib chiqishi Keniya va Gujarat bilan bog‘liq dizayner turibdi. Parmar 16 yoshida Britaniyaning Young Fashion Designer of the Year tanlovida g‘olib bo‘lgan. 2024-yilda esa ayollar kiyimi va raqamli moda yo‘nalishlarida tahsil olgan Ravensbourne University London universitetini a’lo baholar bilan tamomlagan. Bu tajriba uning ish uslubini belgilab berdi: mato va bichim ustida ishlash virtual modellar yaratish bilan birga olib boriladi.
Texnologiyaning bu yerda amaliy vazifasi ham bor. Tikuv boshlanishidan oldin brend kiyimning tanaga mos tushishi, matoning burmalanishi va harakatdagi ko‘rinishini 3D formatida sinab ko‘radi. Bu esa sinov namunalarining sonini kamaytiradi. Kiyimlar Buyuk Britaniyadagi o‘z ustaxonasida buyurtma asosida tikiladi. Shu tariqa raqamli tajribalar kiyim yaratishning kundalik jarayoniga aylanadi.
Humanoid Robot Solutions bilan hamkorlikda tashkil etilgan robotning chiqishi kolleksiya g‘oyasiga aniq ko‘rinish berdi. Podiumda qarish ham, insonning go‘zallikka intilishi ham ahamiyatga ega bo‘lmagan ishtirokchi paydo bo‘ldi. Omnia Vanitas aynan shu jihati bilan qiziq: moda asrlar davomida deyarli o‘zgarmagan istaklar haqida gapirish uchun kelajak texnologiyalariga murojaat qiladi.
Photo BLACK PR
