Botindan mo‘ralagan sas

O‘zlikka qanday quloq tutmoq mumkin

Fotо: Instagram / idaheritier

Bizning ichki ovozimiz - intuitsiyamiz, chuqur istaklarimiz va his-tuyg‘ularimiz ko‘rinishida namoyon bo‘lib, axborot shovqini, atrofdagilarning fikrlari va kundalik tashvishlar bilan to‘lgan dunyoda bizga yo‘l ko‘rsatadi. Bu ovozni eshitish o‘z haqiqiy istaklarimizni anglashni va betakror hayotimizni yashashni o‘rganish demakdir.

Ohistalang va o‘zingizga sukunat hadya eting

Zohiriy tashvishlar butun e’tiborni egallaganda, ichki ovoz deyarli eshitilmaydi. Agar shunday holat yuz bersa, o‘zingiz bilan aloqani tiklashning oddiy usullarini qo‘llab ko‘ring:

  • Musiqa, ijtimoiy tarmoqlar va suhbatlarsiz jimlik daqiqalarini o‘tkazing;
  • Yolg‘iz sayr qiling;
  • Masalan, ertalabki nonushtani telefondan foydalanmasdan o‘tkazish kabi kichik marosimlarni yarating.

Fotо: Instagram / idaheritier

Fikrlar va tuyg‘ular kundaligini yuritishni boshlang

O‘z fikrlaringizni yozib borar ekansiz, his-tuyg‘ular, istaklar va xavotirlarning takrorlanayotganini seza boshlaysiz. Keyinchalik bu siz uchun chindan ham muhim bo‘lgan narsalarni anglashingiz uchun kalit vazifasini o‘taydi.

  • Ushbu mashq davomida quyidagi savollarga javob berishga urinib ko‘ring:
  • Hozir meni nima tashvishga solyapti?
  • Nimadan quvonch topaman?
  • Aslida men nimani istayman?

Onglilikni yuksaltiring

Intuitsiya ko‘pincha tananing sezgilari va his-tuyg‘ular orqali namoyon bo‘ladi. O‘zingizga e’tibor qaratishni o‘rganish muhim: o‘zingiz istamagan narsaga rozi bo‘lganingizda tanangizning qayerida zo‘riqish paydo bo‘ladi? Qaysi lahzalar sizni g‘ayrat va kuchga to‘ldiradi? Qachon yengillik, qachon esa ichki qarshilikni his qilasiz? O‘zingizga nisbatan samimiy bo‘ling, chunki anglash - shifo topishning ilk qadamidir. 

Fotо: Instagram / idaheritier

Qo‘rquv ovozini intuitsiya ovozidan ajratishni o‘rganing

Tasavvur qilib ko‘rsak, qo‘rquv baland ovozda, qat’iy va haddan tashqari ta’sirchan tarzda gapiradi. Intuitsiya esa aksincha, past ovozda, biroq xotirjam va ishonch bilan yangraydi. Agar ularni farqlash qiyin bo‘lsa, o‘zingizga shunday savol bering: "Qo‘rquvim bo‘lmaganda nima qilardim?" Dastlab chin istaklaringizni tan olish oson emas, ammo vaqt o‘tishi bilan ichki ovozingizni eshitishni albatta o‘rganasiz.

O‘zingizga bo‘lgan ishonchning kichik qadamlarini amalda qo‘llang

O‘zingizni tinglashni o‘rganish odatiy harakatlar emas, balki ongli ravishda tanlov qilishni anglatadi. Oddiy narsadan boshlang: avtomatik qarorlarga emas, balki chin dildan xohlagan taomlaringizni tanlang. "Kiyish kerak" deb o‘ylagan kiyimlar emas, balki o‘zingizga haqiqatan ham qulay bo‘lgan kiyimlarni kiying. Ichki his-tuyg‘ularingizga quloq tuting va hatto mayda-chuyda narsalarda ham, agar nimadir ko‘nglingizga o‘tirmasa, "yo‘q" deyishdan tortinmang. Bu kichik qadamlar o‘zingizga va ichki sezgingizga bo‘lgan chuqur ishonchning poydevoridir.

Fotо: Instagram / idaheritier

Tashqaridan tasdiq izlashni bas qiling

Boshqalarning fikriga qanchalik kam bog‘liq bo‘lsak, o‘z ovozimiz shunchalik aniq yangraydi. Bu boshqalarning maslahatlari va tajribasini rad etish degani emas, ammo shuni yodda tutish muhimki, aynan sizga nima mos kelishini faqat o‘zingiz bilasiz. Tinglashni o‘rganing, lekin qarorlar qabul qilishda so‘nggi so‘zni o‘zingizda qoldiring va faqat o‘z his-tuyg‘ularingizga tayanib ish ko‘ring.

Meditatsiya va nafas olish usullarini mashq qilishni boshlang

Aynan ular sokinlashishimizga va ichki ovozimizga quloq solishimizga yordam beradi. Hatto kuniga 5 daqiqalik mashq ham sezilarli natija berishi mumkin.

Maqolani baham ko'ring

Related articles