High Jewelry

Haute couture haftaligi namoyishlari bilan bir vaqtda yuksak zargarlik san’ati taqdimotlari ham o‘tkazilmoqda. Yetakchi uylar eng sara materiallardan qo‘lda yaratilgan noyob taqinchoqlarni namoyish etmoqda. Bunday betakror buyumlar hashamat va abadiy an’analar timsoli bo‘lib qolmoqda.

O‘zgaruvchan aksessuarlar yo‘nalishi jadal rivojlanmoqda: bu mutlaqo yangilik bo‘lmasa-da, brendlar turli ko‘rinishlarga ega bo‘lgan modellarni taklif etishda davom etmoqda. Masalan, marjon osmasini osongina zirak yoki to‘g‘nog‘ichga aylantirish mumkin. Turmalin, ametist va sitrin kabi yarim qimmatbaho toshlar ham yangi to‘plamlarda o‘z o‘rnini topmoqda. Zargarlik uylari arxivlarga murojaat qilib, tarixiy taqinchoqlarning zamonaviy talqinlarini yaratmoqda. Bugungi kunda texnologiyalar jarayonga ko‘maklashsa-da, noyoblikni aynan qo‘lda pardozlash ta’minlaydi.

Quyida 2025-26-yil kuz-qish mavsumining eng yorqin yuksak zargarlik san’ati to‘plamlari keltirilgan:

Boucheron

Boucheron ijodiy direktori Kler Shuan yangi ufqlarni kashf etishni davom ettirib, Carte Blanche 2025 to‘plamini “Impermanence” nomi ostida taqdim etdi. U yapon vabi-sabi falsafasi va ikebana san’atidan ilhomlanib, o‘tkinchilik lahzalari muzlatib qo‘yilgandek zargarlik durdonalarini yaratdi. To‘plam oltita botanik ansambldan iborat bo‘lib, ularning har biri tabiiy aylanishning ma’lum bir bosqichini – to‘liq yorug‘likdan tugashni anglatuvchi qorong‘ulikkacha bo‘lgan davrni ifodalaydi. Qimmatbaho namunalar ustida ustalar 18000 soat mehnat qilishdi. Har bir kompozitsiyada zargarlik buyumlari o‘zgaradi: to‘g‘nag‘ichlar soch bezaklariga, gullar uzuk yoki bilaguzuklarga, hasharotlar esa kichik haykalchalarga aylanadi. Masalan, 6-raqamli kompozitsiya lola, evkalipt va ninachini o‘zida mujassam etgan. Nozik borosilikat shisha olmos va safir shisha bilan uyg‘unlashgan.  4-raqamli kompozitsiya esa siklamen, suli, qurt va kapalakda gavdalangan tong havosidir. Qor qoplash uslubidagi olmoslar va qora lok yorug‘lik va soya o‘yinini yaratadi. To‘plamni ko‘knori, xushbo‘y no‘xat va kapalakli 1-raqamli kompozitsiya yakunlaydi. Gullarning yengilligi qo‘lda naqshlangan shaffof gulbarglar bilan ta’kidlangan, qora lakning zidligi esa hajm va ifodalilik baxsh etadi.

Messika

Valeri Messika o‘z brendining yigirma yilligi munosabati bilan “Terres d’Instinct”ni taqdim etdi. Yuksak zargarlik san’ati taqinchoqlari janubiy Afrika, uning manzaralari, yovvoyi tabiati va ibtidoiy nur jilvasiga bag‘ishlangan. Valeri Namibiya bo‘ylab sayohati davomida bu yurtdan hayratga tushdi: Namibiyaning olovli qumtepalariga, yarqiragan Kalaxari minerallariga, gepardning kuchi va sherning salobatiga mahliyo bo‘ldi. Chiziqli shakllar, ko‘p qatlamli hajmlar va nozik naqshlar jonli materiya tuyg‘usini uyg‘otadi, go‘yo tabiatning o‘zi bu taqinchoqlarni yaratgandek. “Kalahara” marjonida ikkita noyob sariq olmos ajralib turadi, ularning eng kattasi deyarli 35 karat og‘irlikda bo‘lib, o‘zgaruvchan dizayni uni to‘rt xil usulda taqish imkonini beradi. “Mirage” modeli sahro nafasini takrorlaydi: xira oltin va olmos naqshlaridagi mayin egri chiziqlar ufqda eriydigan sarobni eslatadi. “Fauve”da yirtqichning qudrati dadil chiziqlar orqali ifodalangan, go‘yo oltin yuzani tirnoqlar tilib, sochilgan olmoslar nurlariga yo‘l ochgandek. Valeri qarama-qarshiliklar uyg‘unligiga alohida e’tibor qaratdi: masalan, qora oniks va to‘g‘ri burchakli olmoslar ritmik muloqotga kirishib, markazida qalqon shaklidagi ikkita olmosi bor haykaltaroshlik kompozitsiyalarini yaratadi. Tarixda birinchi marta Messika rangli toshlarni ham qo‘shdi: sapfir, yoqut, zumrad, shpinel va anor. 30 karatli Zambiya zumradidan foydalangan holda “Divine Enigma” to‘plamini qayta talqin qilish muhim voqea bo‘ldi. Messika ustalari barcha turdagi qirralar va o‘rnatish usullarini namoyish etadilar: qor qoplamasidan Halo ramkasigacha. Har bir to‘plam “ozod uslub” falsafasini o‘zida mujassam etgan bo‘lib, unda hashamat o‘zgarmas holat emas, balki hayotning ajralmas qismiga aylanadi.

Graff

Graff uyi tarixida tub burilish yasagan davr sharafiga yuksak zargarlik san’atining yangi durdona asari – “1963” to‘plami taqdim etildi. Bu o‘zgarishlar, jasorat va madaniy inqilob davri bo‘lgan yorqin 60-yillarning erkin ruhi va nafosatiga bag‘ishlangan nozik taqinchoqlar to‘plamidir. Davrning ruhiy ta’sir ko‘rsatuvchi naqshlariga ishora qiluvchi oval shakllarning sehrli o‘yini asosiy elementga aylandi. To‘plam tarkibiga umumiy og‘irligi 129 karatdan ortiq bo‘lgan 7790 ta olmos bilan bezatilgan nafis marjon, chiziqli bilaguzuk va ko‘zni qamashtiruvchi ziraklar kiradi. Oval, to‘g‘ri burchakli va dumaloq qirrali toshlar deyarli harakatga kelgandek me’moriy tuzilmalarni shakllantiradi va maftunkor nur jilvasini yaratadi. Har bir taqinchoqda nozik ishora yashiringan – oq oltinga singdirilgan zumrad chizig‘i Graff’ning o‘ziga xos rangiga ishora qiladi. Bu yashirin shtrix to‘plamga alohida quvvat bag‘ishlab, olmoslarning sovuq jilosiga qarama-qarshi turadi. To‘plam brendning taraqqiyot yo‘li, uning rivojlanishi va mukammallikka intilishini anglatadi. Fransua Graffning so‘zlariga ko‘ra, bu kompaniya tomonidan yaratilgan eng murakkab va dadil ziynatlar to‘plamidan biridir.

Mellerio

Dunyodagi eng qadimgi zargarlik uyi va Parijdagi Vandom maydonining ramzi bo‘lgan Mellerio “Jardin des Rêves” kolleksiyasini taqdim etdi. Bir kechaga bo‘lsa ham o‘zini malika deb his qilish orzusidan ilhomlangan Mellerio asriy an’analar va zamonaviy fantaziyani uyg‘unlashtirgan nafis taqinchoqlar to‘plamini yaratdi. Zargarlar oltinga qimmatbaho toshlardan to‘qilgan naqshlarni ishladilar, ularning toji esa ananas shaklida bo‘ldi. “Mevalar qiroli” ramzi bo‘lgan bu bezak marjondagi osma taqinchoqdan hashamatli zirak juftligiga aylanishi mumkin, bu esa brendning o‘ziga xos xususiyati – taqinchoqlarning o‘zgaruvchanligini namoyon etadi. Bellezza Fiori turkumida Mellerio arxiv to‘g‘nog‘ichlariga qaytib, ularni tumorga aylantiradi. Bellezza Fiore Rosa esa Ispaniya malikasi va Savoyya oilasi uchun yaratilgan bezaklardan ilhomlanib, yovvoyi atirgulni ulug‘laydi. To‘plamni Cabinet de Curiosités turkumidagi yangi tumorlar to‘ldiradi, ularda yuqori zargarlik san’ati taqib yurish qulayligi bilan uyg‘unlashadi. Paon Medal esa Mellerio tomonidan XIX asrdayoq birinchi bor talqin qilingan o‘lmaslik va ilohiy nur ramzi bo‘lmish tovus motivini qayta jonlantiradi

Chanel

Oltin soat sehridan ilhomlangan Chanel brendi yuqori zargarlik san’atining yangi kolleksiyasini taqdim etdi. Patris Legero va uyning zargarlik studiyasi kun va tun oralig‘idagi qisqa lahzani – dunyo bir muddat to‘xtab qolganday tuyulgan damni bezaklarda aks ettirdi. “Reach for the Stars” kolleksiyasi – bu hashamat va yengillik uyg‘unlashgan, me’moriy shakllar egiluvchanlik kasb etgan glamurning she’riy talqinidir. Olmos Gabriel Shanelga yaqin bo‘lgan uch ramzni: kometa, qanotlar va sherni ta’kidlab, asosiy qahramonga aylanadi. Qimmatbaho toshlar sharsharasi ufqdagi quyosh nurlari kabi terida jilolanadi. Kolleksiyada ajoyib chokerlar, ochiq bo‘yin taqinchoqlari, hajmdor to‘g‘nag‘ichlar va assimetrik osma ziraklar mavjud. Dadil uzuklar, keng bilaguzuklar va nafis tojlar bu qimmatbaho nur hamda shakl simfoniyasini davom ettiradi. Taqinchoqlar oq-qora gamma yoki rangli toshlar urg‘usi bilan yaratilgan bo‘lib, zamonaviy ohang qo‘shadi. Chanel yuqori zargarlik san’ati nafaqat uslubning ifodasi, balki o‘zini erkin namoyon qilishning ramziga aylanadi.

Suratlar brendlarning axborot xizmatlari tomonidan taqdim etilgan.