Mavsumning birinchi qo‘shma namoyishi bo‘lib o‘tdi: Tashkent Film School x ELLE O‘zbekiston

“Tashkent Film School” mustaqil kino va vizual amaliyotlar maktabi qoshidagi “Kinoxona” kinoteatrida “Mahsulotlar 24” – real voqealarga asoslangan keskin ijtimoiy drama filmining maxsus namoyishi o‘tkazildi. Kartina muallifi – rejissyor va TFS hamta’sischisi Mixail Borodin.

Filmning bosh qahramoni Muhabbat O‘zbekistondan kelgan muhojir bo‘lib, Moskva chekkasidagi kichik oziq-ovqat do‘konida ishlaydi. Ko‘pchilik uyqu tumanlaridagi bunday odatiy oziq-ovqat do‘konlarida bo‘lgan: ko‘p qavatli beton binolarning yerto‘lalarida joylashgan kichkina xonalar, peshtaxta ortida migrantlar turadi. Biroq fasad ortida yashiringan narsa shafqatsiz va adolatsiz haqiqatdir. Muhabbat va uning hamkasblari qullikka tushib qoladilar. Pulsiz, hujjatlarsiz va qochib ketish imkoniyatisiz.

Qo‘rquv va umidsizlikni yengib o‘tgan qahramon ozodlikka erishadi. Ammo oldinda uni og‘riq, murosa va yo‘qotishlarga to‘la uzoq yo‘l kutmoqda, chunki eng aziz narsani qaytarib olish uchun u kurashishi kerak bo‘ladi.

Film ommaviy axborot vositalarida keng aks-sado uyg‘otdi, Berlin kinofestivalida e’tirof etildi, ammo shunga qaramay, haqiqiy do‘kon qullar mehnatidan foydalangan holda o‘z faoliyatini davom ettirmoqda.

Namoyishdan so‘ng film muallifi Mixail Borodin va ELLE O‘zbekiston bosh direktori Oleg Drobot bilan suhbat o‘tkazildi. Tomoshabinlar film rejissyoriga savollar berishdi, so‘ngra Toshkent kino maktabi hovlisida munozarani davom ettirishdi. Bon fransuz qahvaxonalari tarmog‘i yangi pishiriqlar bilan ta’minladi, bu esa film muhokamasiga qulaylik va samimiylik qo‘shdi.

Tashkent Film School faoliyati haqida batafsil ma’lumotni ularning Instagram sahifasidan topishingiz mumkin.

Foto: Ilya Semendeyev