Oriental Fashion Show
O‘zbekistonlik dizaynerlar Parijda o‘z kolleksiyalarini namoyish etdilar
“Oriental Fashion Show” – Sharqning boy madaniy merosi va zamonaviy moda yo‘nalishlarini targ‘ib qilishga bag‘ishlangan xalqaro hodisa. Aynan shu ulkan hodisada, 26-yanvar kuni Parij shahrida o‘zbekistonlik dizaynerlar o‘z to‘plamlarini namoyish etdilar.
“O‘zbek madaniyatining ajralmas qismi bo‘lgan “Ustoz-shogird” an’anasiga alohida e’tibor qaratildi. Hurmat va vorislikka asoslangan bu tamoyil Ra’no Hamroyeva va uning shogirdlari - Noila Jalolova, Nargiza Jabborova va Shahnoza Muzrapovalar ijodida yorqin aks etgan. Ularning sa’y-harakatlari va ijodiy yondashuvi tufayli biz an’analar zamonaviy tendensiyalar bilan qanday uyg‘unlashishini ko‘rsata oldik”, – deydi fashion prodyuser Samandar Sarayev.
Taqdim etilgan to‘plamlar boy meros asosida yaratilgan va zamonaviy estetik yechimlar bilan boyitilgan tarixiy voqealarni hikoya qildi.
Ra’no Hamroyeva an’anaviy so‘zana kashtalari va o‘zbek matolarining yorqin ranglaridan ilhomlanib, Rano Collection turkumini yaratdi.
Foto: Paul Tomasini
Foto: Paul Tomasini
Shahnoza Muzrapova “SHAKHAZIZ” to‘plamida san’atga, go‘zallik va nafosatga bo‘lgan chuqur muhabbatni aks ettirgan. Uning ishlari 1940-1960-yillardagi nafis va boqiy dizayndan ilhomlanib, momo va buvilarning garderoblarida aks etgan.
Samarqandlik Noila Jalolova O‘zbekiston madaniy merosini qayta tiklashga e’tibor qaratib o‘tdi. Parijda taqdim etilgan to‘plam tarixiy go‘zallik va zamonaviy modani uyg‘unlashtirdi.
Foto: Paul Tomasini
Foto: Paul Tomasini
Xorazmlik Nargiza Jabborova qadimiy kiyinish an’analarini zamonaviy tarzda talqin etishga intildi. Har bir model milliy urf-odatlarning uyg‘unligini aks ettirib, madaniy o‘ziga xoslikning boyligini namoyish etdi.
Foto: Paul Tomasini
Foto: Paul Tomasini
Samandar Sarayev boshchiligidagi delegatsiyaning ishtiroki mamlakatning jahon moda maydonidagi ta’siri ortib borayotganidan dalolat beradi.
