Qarishni sekinlashtiruvchi mahsulotlar

Garchi qarishni butunlay to‘xtatish mumkin bo‘lmasa-da, jarayonni sekinlashtiradigan, organizm hujayralarini shikastlanishdan himoya qiladigan va ularning tiklanishiga yordam beradigan mahsulotlar mavjud. Bu mahsulotlar antioksidantlar, vitaminlar, minerallar va boshqa foydali moddalarga boy.

Rezavor mevalar

Bunday mevalarga chernika, malina, qulupnay va klyukva kiradi. Ular antotsianlarga boy bo‘lib, hujayralarni erkin radikallarning yemiruvchi ta’siridan himoya qiladi, xotirani yaxshilaydi va teri salomatligini saqlaydi.

Yong‘oqlar

Yong‘oq, ayniqsa, yunon yong‘og‘i va bodom terining elastikligini saqlashga yordam beradigan hamda uni ultrabinafsha nurlarning zararli ta’siridan himoya qiladigan E vitaminning boy manbai hisoblanadi. Bundan tashqari, ular yurak va tomirlar salomatligini saqlash uchun foydali yog‘larni o‘z ichiga oladi.

Avokado

Avokado – antioksidantlarga, shu jumladan glutationga boy bo‘lgan haqiqiy super ozuqa bo‘lib, u qarish jarayonlarini sekinlashtiradi. Bundan tashqari, u terining tarangligi va elastikligini saqlashga yordam beradigan mono to‘yinmagan yog‘larni o‘z ichiga oladi.

Yashil bargli sabzavotlar

Ismaloq, karam va brokkoli kabi sabzavotlar A, C va K vitaminlariga boy bo‘lib, ular hujayralarni yangilash va suyaklarni mustahkamlashga yordam beradi. Bundan tashqari, ularda ko‘z salomatligini saqlash uchun zarur bo‘lgan lyutein moddasi mavjud.

Fotо: Pexels

Pomidorlar

Ushbu yorqin mevalar terini quyosh ta’siridan himoya qiladigan va yurak-qon tomir tizimini mustahkamlaydigan kuchli antioksidant likopin bilan to‘yingan.

Sarimsoq

Sarimsoq o‘zining yallig‘lanishga qarshi va antiseptik xususiyatlari bilan mashhur. U qondagi xolesterin darajasini samarali pasaytiradi va immunitet tizimini mustahkamlaydi, organizmning kasalliklarga qarshi kurashishiga yordam beradi.

Losos va yog‘li baliq

Losos va boshqa turdagi yog‘li baliqlar omega-3 yog‘ kislotalariga boy bo‘lib, ular yurakni mustahkamlaydi, miya salomatligini saqlaydi va teri holatini yaxshilaydi. Bundan tashqari, ushbu qimmatli moddalar organizmning qarishini sekinlashtirib, yallig‘lanish jarayonlarini kamaytirishga yordam beradi.

Qora shokolad

Uning foydali xususiyatlaridan maksimal darajada foydalanish uchun tarkibida kakao miqdori 70% va undan yuqori bo‘lgan shokoladni tanlang. Kakaodagi flavonoidlar qon aylanishini yaxshilaydi va terini jarohatlanishdan himoya qilib, uning salomatligini saqlab qoladi.

Fotо: pexels

Don mahsulotlari

Donli mahsulotlar qondagi qand miqdorini barqaror ushlab turishga yordam beradi va organizm hujayralarining uzoq muddatli himoyasini ta’minlaydi.

Sitrus mevalar

Apelsin, limon va greypfrut kabi sitrus mevalari S vitaminiga boy bo‘lib, u kollagen ishlab chiqarishni rag‘batlantiradi. Bu oqsil terining elastik, yosh va yorqin bo‘lishiga yordam beradi.

Anor

Ushbu meva terini mustahkamlaydigan, hujayralarning qarishini sekinlashtiradigan va tanani erkin radikallar ta’siridan himoya qiladigan punikalagin va antioksidantlarni o‘z ichiga oladi.

Fotо: Pexels

Zarchava

Zarchava (kurkuma)ning faol moddasi bo‘lgan kurkumin kuchli antioksidant va yallig‘lanishga qarshi xususiyatlarga ega bo‘lib, ular qarish jarayonlarini sekinlashtiradi va hujayralarni turli xil shikastlanishlardan himoya qiladi.

Probiotikli mahsulotlar

Yogurt, kefir va tuzlangan karam ichak salomatligini ta’minlovchi probiotiklarga boy. Bu, o‘z navbatida, organizmning umumiy holatiga, shu jumladan immunitet va tashqi ko‘rinishiga ijobiy ta’sir ko‘rsatadi.

Qarishni sekinlashtirish uchun ovqatlanish bo‘yicha maslahatlar

• Yangi sabzavot va mevalarni ko‘proq iste’mol qiling;
• Shakar, transyog‘lar va qayta ishlangan mahsulotlar miqdorini kamaytiring;
• Yetarlicha suv iching – namlanish qarishni sekinlashtirishda asosiy rol o‘ynaydi;
• Ratsioningizga tarkibida antioksidantlar ko‘p bo‘lgan mahsulotlarni muntazam qo‘shib turing.

Faol turmush tarzi va salomatlik haqida g‘amxo‘rlik bilan birgalikda ovqatlanish yoshlik va energiyani uzoqroq saqlashga imkon beradi!