Women In Tech Uzbekistan
Jamoaning bir yillik yutuqlari haqida hikoya qilamiz
"Women in Tech" — Fransiya prezidenti homiyligida rivojlanayotgan global tashkilot bo‘lib, to‘rtta asosiy yo‘nalishga e’tibor qaratadi: ta’lim, biznes, raqamli inkluziya va huquqlarni himoya qilish.
Bu jamiyat ayollar va qizlarni STEAM (science, technology, engineering, arts and mathematics) sohalarida muvaffaqiyatli karyera qurishlari uchun zarur bo‘lgan ko‘nikmalar va ishonchni shakllantirish orqali o‘qitish, qo‘llab-quvvatlash va ularning salohiyatini oshirishni maqsad qilgan.
Women in Tech (WIT) vakolatxonalari - chapterlar - dunyoning 60 mamlakatida faoliyat yuritadi va 500 mingdan ortiq ishtirokchini qamrab oladi. Women in Tech Global har yili xalqaro mukofotlar va sammitlar tashkil etadi.
2024-yil 2-martda O‘zbekistonda Markaziy Osiyodagi birinchi chapterning ochilishi tarixiy voqea bo‘ldi. Uning tashkil etilishi MarTech sohasida 15 yillik tajribaga ega yetakchi, Women In Tech Uzbekistan direktori Anna Ambrozevichning sa’y-harakatlaridir. Bundan tashqari, Maslahat kengashi tarkibiga O‘zbekiston Respublikasi raqamli texnologiyalar vazirining maslahatchisi Kamola Shavkatovna Sobirova va mamlakatning axborot texnologiyalari sohasidagi yirik kompaniyalarning boshqa vakillari kirdi.
Jamoa allaqachon 16 yoshdan 40 yoshgacha bo‘lgan 30 nafar ko‘ngillini o‘z ichiga oladi, hamjamiyat esa 4000 dan ortiq kishidan iborat.
Bu yil mobaynida Women In Tech Uzbekistan turli mavzularda 40 dan ortiq tadbir tashkil etdi va ularni o‘tkazdi: kiberxavfsizlik, Data Science, FemTech, Digital Marketing, muzokaralar va nizolar bilan ishlash. Ma’ruzachi va ishtirokchilar sifatida O‘zbekistondan hamda boshqa mintaqalardan taklif etilgan STEAM sohasidagi ayol mutaxassislar qatnashdi.
Asosiy loyihalardan biri "Women In Tech Talks" turkumi bo‘lib, unda tashkilot yetakchi kompaniyalarning ayol vakillari bilan bevosita ularning ofislarida uchrashuvlar o‘tkazdi. Ishtirokchilar haqiqiy faoliyat haqidagi hikoyalarni tinglash, savollar berish va kompaniya ichida bo‘lish uchun noyob imkoniyatga ega bo‘lishdi. Bunday format nafaqat ilhomlantiradi, balki korporativ madaniyat va ish istiqbollarini chuqurroq anglashga yordam beradi. Yil davomida bunday uchrashuvlar Click, FIDO-Biznes, TBC, Group-IB kompaniyalari ofislarida amalga oshirildi.
Global miqyosda jamoa Cardano Academy’da blokcheyn asoslarini o‘qitish va Lyuksemburg Yevropa Biznes Institutidan onlayn MBA kurslarini taqdim etish kabi ta’lim tashabbuslarini rivojlantirmoqda.
Mahalliy darajada esa oliy o‘quv yurtlari bilan faol hamkorlik olib bormoqda va hamkorlik tarmog‘ini kengaytirmoqda. Bu yil tashkilot New Uzbekistan University va Apple bilan birgalikda Women In Tech Uzbekistan ishtirokchilari uchun iOS-dasturchilarni tayyorlash bo‘yicha maxsus dasturni ishga tushirmoqda. Shuningdek, jamoa universitetlarda elchilik dasturini yo‘lga qo‘ymoqda: talaba qizlar STEAM dunyosiga yo‘l ko‘rsatuvchi bo‘lib, jamiyat imkoniyatlari va karyera istiqbollari haqida ma’lumot beradilar.
"Women In Tech Uzbekistan" o‘z faoliyatining birinchi yilida mamlakatimiz vakillarini Parijda o‘tkazilgan "Women in Tech Global Summit" xalqaro anjumaniga yubordi. U yerda qizlarimiz UZINFOCOM hamkorlari bilan birgalikda yaratilgan "Ayol Aoli" filmini namoyish etishdi.
Shu yilning aprel oyida O‘zbekiston delegatsiyasi Yaponiyaning Osaka shahrida bo‘lib o‘tadigan xalqaro anjumanga tashrif buyuradi. Tashkilot mamlakat jamoasini shakllantirishni davom ettirmoqda, shu sababli ishtiyoqmandlar hali ham unga a’zo bo‘lishlari mumkin.
2024-yilda Toshkentda "Women in Tech Caucasus & Central Asia Awards" mintaqaviy mukofoti topshirish marosimi ham o‘tkazildi. Ilk bor mukofot Markaziy Osiyo davlatida taqdim etildi. Finalchilar orasida O‘zbekistonning 11 nafar vakili bo‘lib, ulardan 3 nafari g‘oliblikka erishdi.
Muhim jihat shundaki, Women In Tech Uzbekistan Google kompaniyasining #IAmRemarkable global tashabbusini mamlakatimizga olib kirdi. Jamoada tashabbusning ikki rasmiy vositachisi bor - Natalya Ni va Yuliya Sevruk. Ular barcha istaganlar uchun onlayn va oflayn seminarlar o‘tkazmoqda.
Bu kichik guruhli tadbirlar bo‘lib, unda qizlar va ayollar xavfsiz muhitda o‘z yutuqlari haqida faxr bilan so‘zlashni, muvaffaqiyatlarini nishonlashni va o‘z qadr-qimmatini anglashni o‘rganadilar. Mazkur format shunchalik ommalashib ketdiki, kompaniyalarning o‘zlari o‘z xodimlari uchun bunday seminarlar tashkil etishni so‘ramoqdalar.
Women In Tech Uzbekistan O‘zbekiston IT hamjamiyati bilan hamkorlikda mamlakatning 14 ta hududini qamrab olgan keng ko‘lamli "Roadshow" loyihasini ishga tushirdi. Jamoa O‘zbekiston bo‘ylab sayohat qilib, o‘z bilimlarini ulashmoqda, IT sohasiga kirishni orzu qiluvchilar bilan tanishmoqda va qizlar uchun texnologiyalarda yangi imkoniyatlarni ochmoqda. Ular allaqachon Olmaliq, Guliston, Farg‘ona, Qo‘qon, Jizzax, Namangan, Andijon va Bekobodda bo‘lishdi.
Shuningdek, shu yil davomida biznes doirasidagi hamkorlar bilan 9 ta strategik memorandum imzolandi, bu esa texnologiya sohasida ayollarni qo‘llab-quvvatlashni yanada mustahkamladi. Ayniqsa, Toshkentdagi memorandumlarni Women in Tech tashkilotining asoschisi va bosh direktori Ayumi Mur Aokining shaxsan o‘zi imzolagani alohida ahamiyatga ega.
O‘zbekistonda bo‘lim ochilganidan so‘ng, hamjamiyatga Women in Tech Kazakhstan va Women in Tech Kyrgyzstan qo‘shildi. Jamoa ular bilan yaqin aloqada bo‘lib, ularning ochilish marosimlarida mamnuniyat bilan ishtirok etdi.
Women In Tech Uzbekistan ta’kidlayaptiki, bu hali boshlanishi, xolos. Bu yil faqatgina birinchi bob. Bundan keyin yanada ko‘proq ishlar amalga oshiriladi. Biz birgalikda o‘sib bormoqdamiz!
