Yuralarni zabt etgan sayyoramizning go‘zal manzaralari

Yil boshlanishi – yangi sayohatlar va madaniy kashfiyotlarni rejalashtirish uchun eng qulay fursat. Xoh ekzotik go‘shalar bo‘lsin, xoh madaniyat durdonalari – dunyo umr davomida kamida bir marta ko‘rishga arziydigan joylar bilan to‘la. ELLE O‘zbekiston tahririyati 2025-yilda tashrif buyurish ro‘yxatingizga qo‘shishingiz kerak bo‘lgan mamlakatlarni taqdim etadi.

Islandiya

Mamlakat o‘zining tabiiy mo‘jizalari: sharsharalari, vulqon maydonlari va issiq buloqlari bilan sizni lol qoldiradi. Moviy laguna orom baxsh etadi, shimoliy yog‘du esa tunni haqiqiy sehrga aylantiradi. Agar siz qo‘l tegmagan tabiatni qadrlab, ilhom izlasangiz, albatta Islandiyaga tashrif buyuring.

Fotо: Pexels

Gretsiya

Qadimiy xarobalar va ilk sivilizatsiyalar yurti – bu mamlakat qadimiy afsonalar va hayratlanarli tabiat manzaralarini o‘zida mujassamlashtirgan. Gretsiyada siz afsonalarga sho‘ng‘ishingiz, go‘zal orollarni kashf etishingiz va unutilmas sayohat xotiralarini yaratishingiz mumkin.

Fotо: Pexels

Yaponiya

Qadimiy an’analar va ilg‘or texnologiyalarning uyg‘unligi, yirik festivallar va mashhur sakura gullashi mamlakat va xalqning haqiqiy ruhini his qilish imkonini beradi. Bu yerda siz asrlar davomida saqlanib kelgan ibodatxonalar va zamonaviy shahar manzaralari muhitiga sho‘ng‘ib, noyob madaniy tajriba va ajoyib xotiralarga ega bo‘lasiz.

Fotо: Pexels

Marokash

Sharq bozorlari, gavjum madinalar va qadimiy sirlar... Marokash hayrat va madaniy kashfiyotlarning tuganmas manbaiga aylanadi. Tabiiy tafovutlar kishini hayratga soladi: bir tomondan bog‘lar va mandarin daraxtzorlar, boshqa tomondan esa Sahroning bepoyon qum tepaliklarini ko‘rasiz.

Fotо: Pexels

Ummon

Sahro va tog‘lar orasidagi arab ertagi – Ummon – qadimiy an’analar va tabiiy go‘zallikning uyg‘unligi bilan maftun etadi. Ulug‘vor tog‘lar, sahrolarning oltin qumlari va qirg‘oqlarning moviy suvlari ajoyib manzaralarni hosil qiladi. Bu joy sokinlik, betakror madaniyat va samimiy mehmondo‘stlikni izlayotganlar uchun mukammal manzil bo‘ladi.

Fotо: Pexels

Peru

Machu-Pikchu tog‘larida yashiringan inklarning sirli shahri “bulutlar orasidagi shahar” nomi bilan tanilgan. Uning ajoyib me’morchiligi, tabiat manzaralari va xalqning boy madaniy merosi hech kimni befarq qoldirmaydi. Shuningdek, mamlakat poytaxti – mahalliy oshxonasi o‘zining xilma-xilligi bilan hayratga soladigan jonli megapolisga ham albatta tashrif buyuring.

Fotо: Pexels

Avstraliya va Yangi Zelandiya

Bu ikki mamlakat o‘zining tabiiy xilma-xilligi, noyob o‘simlik va hayvonot dunyosi bilan kishini lol qoldiradi. Avstraliya sizga ulkan Buyuk to‘siq rifini, kenguru va koalalar bilan uchrashuvni, shuningdek, mukammal serfing uchun cheksiz okean to‘lqinlarini taqdim etadi. Yangi Zelandiya, ayniqsa uning Janubiy oroli, sizni qadam yetmagan manzaralar: ulug‘vor tog‘lar, zumrad ko‘llar va afsonaviy geyzerlar bilan hayratda qoldiradi.

Fotо: Pexels