“Oltin globus” yakuniga yetdi
Qaysi aktrisalar mukofotga sazovor bo‘ldi?
"Oltin globus-2025" mukofotini topshirish marosimining 8 2-taqdimoti yakunlandi. Tadbir 5-yanvardan 6-yanvarga o‘tar kechasi Kaliforniyadagi Beverly Hilton mehmonxonasida bo‘lib o‘tdi. Agar siz barcha voqealarni o‘tkazib yuborgan bo‘lsangiz, rasmiy YouTube kanalida mukofotlash marosimi videolari hamda taklif etilgan mehmonlar, nomzodlar va g‘oliblar bilan o‘tkazilgan suhbatlarni tomosha qilishingiz mumkin.
2025-yilda quyidagi aktrisalar nominatsiyalarda mukofotlarga sazovor bo‘lishdi:
Eng yaxshi drama aktrisasi — Fernanda Torres, “Men hali ham shu yerdaman”
Eng yaxshi komediya yoki musiqali film aktrisasi — Demi Mur, “Substansiya”
Eng yaxshi ikkinchi darajali aktrisa — Zoi Saldana, “Emiliya Peres”
Eng yaxshi serial drama aktrisasi — Anna Savai, “Syogun”
Eng yaxshi serial komediya yoki musiqali film aktrisasi — Jin Smart, “Hiylalar”
Eng yaxshi serial ikkinchi darajali aktrisasi — Jessika Ganning, “Kiyikcha”
Eng yaxshi mini-serial, telefilm yoki antologiya aktrisasi — Jodi Foster, “Haqiqiy detektiv: Tungi o‘lka”
"Oltin globus"ning rasmiy saytida e’lon qilinishicha, so‘nggi 28 yil mobaynida Mukofot jamg‘armasi notijorat tashkilotlar, akademik dasturlar va insonparvarlik tashkilotlariga 55 million dollardan ortiq mablag‘ xayriya qilgan, kollej talabalariga 2224 tadan ko‘proq stipendiya taqdim etgan hamda 138 dan ortiq klassik filmlarni qayta tiklash ishlarini moliyalashtirgan.
