Shavkat Mirziyoyev tamal toshini qo‘ydi
O‘zbekiston Milliy muzey qurilishi
27-avgust kuni O‘zbekiston Prezidenti Shavkat Mirziyoyev O‘zbekiston Milliy muzeyi qurilishiga ramziy tamal toshini qo‘ydi. Loyiha mashhur yapon me’mori Tadao Ando tomonidan Germaniyaning Atelier Brückner studiyasi bilan hamkorlikda ishlab chiqilgan.
40 ming kvadrat metr maydonga ega bu ulkan majmua muzey, kutubxona, restavratsiya laboratoriyalari va zamonaviy jamoat maydonlarini birlashtiradi. Bosh pudratchi sifatida xitoylik yirik CSCEC kompaniyasi tanlangan.
Kelajakdagi muzey O‘zbekistonning eng yirik madaniy maskaniga aylanishi kutilmoqda. Bu yerda bir vaqtning o‘zida 10 mingga yaqin eksponatni namoyish qilish imkoniyati yaratiladi. Bo‘lajak muzey me’morchilik konsepsiyasi Sharq merosi hamda zamonaviy jahon san’ati o‘rtasidagi muloqotni aks ettirgan holda shakllarning aniqligi va makonning shoirona nafosatini uyg‘unlashtiradi. Bu shunchaki binogina bo‘lib qolmay, balki O‘zbekistonning ochiqlik, xotira va madaniy uyg‘onish ramziga aylanishi kutilmoqda.
Tantanali ochilish 2028-yilga mo‘ljallangan.
