Haute Jewels Geneva 2025
Bepoyon hashamat: marvarid jilosi va zargarlik san’at cho‘qqilari
2025-yilning 31-martidan 6-apreliga qadar Jeneva yana oliy zargarlik san’atining jahon markaziga aylanadi - aynan shu yerda, InterContinental Geneva mehmonxonasining hashamatli zallarida Haute Jewels Geneva ko‘rgazmasi o‘tkaziladi. Bu yilgi tadbir dunyoning 47 ta nufuzli zargarlik uylarini birlashtirdi va ilk bor barcha ekspozitsiyalar mehmonlar uchun maksimal qulaylik va estetik zavq bag‘ishlash maqsadida bitta maydonda namoyish etiladi.
Foto: Haute Jewels Geneva axborot xizmati
Ishtirokchilar safiga yangi mashhur nom - tarixi Italiya zargarlik san’atining oltin solnomasiga bitilgan Damiani uyi ham kiritildi. Doimiy ishtirokchilar orasida Pasquale Bruni, Marco Bicego, Leo Pizzo, Crivelli, shuningdek, Dolce & Gabbana, Sicis Jewels, Picchiotti, Palmiero, Carrera y Carrera, Chimento, Verdi, Mariani, Mattia Cielo, Stenzhorn, Casato, Bayco, Luisa Rosas va boshqa ko‘plab mashhur brendlar ham bor.
“Bu yil biz barcha brendlarni bitta chodir ostida - InterContinental mehmonxonasida birlashtirdik. Bu qaror tadbirning umumiy ruhini yanada yaxlitlashtiradi, mehmonlarning taassurotlari esa yanada yorqin va boy bo‘lishini ta’minlaydi”, – deydi Haute Jewels Geneva asoschisi va Yoko London kompaniyasi bosh direktori Maykl Xakimian.
Marvarid nafosatining yangi davri: Yoko London qaytishi
Ko‘rgazmaning eng kutilgan taqdimotlaridan biri noyob marvaridlarga ixtisoslashgan dunyodagi yetakchi zargarlik uyi – Yoko Londonning ekspozitsiyasi bo‘ldi. Brend o‘zining ulkan ijodiy namunalarini taqdim etdi - bu to‘plamda an’anaviylik dadil yangilik bilan uyg‘unlashib, noyob tabiiy ranglar butunlay boshqacha jiloda namoyon bo‘ladi.
Foto: Haute Jewels Geneva axborot xizmati
Asosiy e’tiborni tortuvchi marvaridlar orasida Janubiy dengizlarning durdona marvaridlari, maftunkor pista rangli marvaridlar, nozik Akoya va sehrli Taiti namunalari bor. Har bir taqinchoq mukammallikka intilishni aks ettiradi: nafis sayqallashdan tortib an’analar yangicha ohang kasb etadigan zamonaviy dizayngacha.
“52 yildan buyon biz marvaridning imkoniyatlarini qayta anglab, dizayn va texnologiya chegaralarini kengaytirmoqdamiz”, –deydi Maykl Xakimian. – Jenevada biz brend tarixidagi eng jasur va mukammal ishlarimizdan birini namoyish etdik”.
Foto: Haute Jewels Geneva axborot xizmati
Yoko Privé: marvaridlar san’at darajasida
Yoko London ishtirokining cho‘qqisi sayyoramizning eng noyob marvaridlarini o‘z ichiga olgan g‘oyat eksklyuziv turkum – Yoko Privé kolleksiyasining taqdimoti bo‘ldi. Har bir buyum shunchaki taqinchoq emas, balki shakl, nur va tuzilish tili bilan hikoya qilingan tarixdir. Bu yerda rang, hajm va jilo bo‘yicha saralash mutlaq darajaga yetkazilgan, chunki Yoko Privé liniyasi hashamatning asl mohiyatini: noyoblik, go‘zallik va abadiy nafislikni ifodalashga qaratilgan.
Foto: Haute Jewels Geneva axborot xizmati
Brendning London ustaxonasida yaratilgan Yoko Privé kolleksiyasidagi zargarlik buyumlari oliy zargarlik san’atining timsoli bo‘lib, unda har bir marvarid o‘z durdonasining bosh qahramoniga aylanadi.
