Kuz-qish mavsumning to‘y modasi

Nozik va nafis siluetlar

27 Noy 2024

Fatima Abdievadan

To‘y modasi to‘xtovsiz rivojlanib, kelinlarga tobora ko‘proq nafis variantlarni taqdim etmoqda. 24/25-yilgi kuz-qish mavsumida dizaynerlar klassik uslublarga sodiq qolgan holda yangi g‘oyalarni ilgari surdilar. Podiumlar va vitrinalarni Peter Langner va Zuhair Murad kabi brendlar hashamatli haykaltaroshlik liboslari bilan bezatdi, Wona Concept va Berta esa kelinning ikkinchi qiyofasi uchun benuqson ansambllarni taklif etdi. Shuningdek, zamonaviy tendensiyalarga moslashtirilgan past belli nafis siluetlar, ingichka yelka bog‘ichlari va shaffof to‘rlarning qaytganini ko‘rdik.

Mukammal ko‘ylak izlayotgan kelinlar yoki shunchaki to‘y modasi ishqibozlari uchun ELLE O‘zbekiston 24/25-yilgi kuz-qish mavsumining 6 ta asosiy yo‘nalishini jamlab berdi.

To‘rlar ko‘pligi

Kech kuzda to‘rlar yana to‘y podiumlarining markaziga qaytib, kelinlarga ushbu klassik materialga yangicha nigoh tashlashni taklif qilmoqda. Zuhair Murad kabi dizaynerlar nafis naqshli elegant yenglar uchun to‘rlardan foydalanib, liboslarga nafosat bag‘ishlamoqda. Justin Alexander esa jozibador kesimli ko‘ylaklar va havodek yengil to‘rli yubkalarni taklif etib, yengillik tuyg‘usini uyg‘otmoqda. Berta brendining ko‘ylaklari qiziqarli yechim bo‘ldi: ularda to‘rning yirik elementlari shaffof qo‘shimchalar bilan uyg‘unlashib, obrazga jasorat va teranlik qo‘shmoqda.

foto: spotlight \ zuhair murad

foto: spotlight \ justin alexander

foto: spotlight \ berta

Past bel

Bel qismi past bo‘lgan ko‘ylaklar to‘y modasiga retro-glamur ohanglarini olib kirib, kolleksiyalarga qaytmoqda. Ines Di Santo va Jenny Yoo tomonidan taqdim etilgan zamonaviy talqinlar hashamatli yubkalar va nozik chiziqlar tufayli ayollikni ta’kidlab, siluetni nafis aks ettirmoqda. Masalan, Sassi Holford’ning past belli va hajmdor ipak yubkali modeli qiyofaga ulug‘vorlik baxsh etsa, fata yoki aksessuar kabi detallar nafislik va uslub qo‘shmoqda.

foto: spotlight \ ines di santo

fotо: spotlight \ jenny yoo

fotо: spotlight \ sassi holford

Hashamatli yubkalar

24/25-yilgi kuz-qish mavsumida klassik bal liboslari haykaltaroshlik elementlari tufayli yangicha ko‘rinish kasb etmoqda. Badgley Mischka, Zuhair Murad va Monique Lhuillier kabi dizaynerlar an’anaviy shakllarni qayta ko‘rib chiqib, ajoyib hajm yaratuvchi me’moriy tafsilotlarni qo‘shmoqdalar. Kristallar yoki applikatsiyalar bilan bezatilgan, tyul va organzadan tikilgan ko‘p qatlamli yubkali ko‘ylaklar ta’sirchan vizual effektni ta’minlaydi.

fotо: spotlight \ Badgley Mischka

fotо: spotlight \ zuhair murad

fotо: spotlight \ monique Lhuillier

Nafis yelka bog‘ichlari

Ingichka yelka bog‘ichlari yana ommalashib, liboslarga nazokat va nafislik baxsh etmoqda. To‘y dizaynerlari Lihi Hod va Rime Arodaky’ning yelka bog‘ichli ko‘ylaklari yelka va bo‘yin chizig‘iga e’tiborni jalb qilib, obrazga nafosat qo‘shmoqda. Justin Alexander’ning to‘rli bog‘ich va chuqur o‘yma yoqali liboslari nafislik va uslubni qo‘shib, ayollikni ta’kidlamoqda.

foto: spotlight \ rime arodaky

foto: spotlight \ lihi hod

foto: spotlight \ justin alexander

Ochiq yelkalar

Yelkalari ochiq ko‘ylaklar bu mavsum uchun zaruriy unsurga aylanib, obrazga romantik joziba qo‘shmoqda. 24/25-yilgi kuz-qish modalar haftaligida Wona Concept va Halfpenny London to‘y brendlari tananing yuqori qismini vizual jihatdan uzaytiruvchi drapirovkali siluetlarni namoyish etdi. Dizaynerlar hatto salqin mavsumda ham ayollik chegarasiz ekanligini isbotladilar.

foto: spotlight \ Wona Concept

foto: spotlight \ Halfpenny London

After-party

After-party uchun kelinlarning ikkinchi to‘y obrazlari tobora ommalashib bormoqda va ko‘plab dizaynerlar dadil yechimlarning dolzarbligini tasdiqlashmoqda. Modellar xilma-xilligi hayratlanarli: Idan’ning effektli mini-ko‘ylaklaridan tortib Wona Concept’ning patli hashamdor liboslarigacha. Bu liboslar kelinlarga bayramning har bir bosqichida uslubini o‘zgartirish va porlash imkonini beradi. Kamtarona ko‘rinishni afzal ko‘ruvchi, ammo o‘ziga xoslikni qo‘shishni istovchilar Berta moda uyi taklif etgan yopinchiqli variantlarga e’tibor qaratishlari mumkin. Zamonaviy kelinlar sodda ansambllar va yorqin, boy liboslar o‘rtasida tanlov qilib, o‘z ziyofatlari uchun betakror uslub yaratishlari mumkin.