Parijda Kristian Krog ko‘rgazmasi
Shimoliy Yevropani zabt etgan, ammo Fransiyada e’tibordan chetda qolgan iste’dod
Orse muzeyida 25-mart kuni Norvegiyada mashhur rassom Kristian Krogga bag‘ishlangan ko‘rgazma ochildi. Shimoliy Yevropada taniqli, biroq Fransiyada deyarli noma’lum bo‘lgan norvegiyalik rassom, shu bilan birga naturalist, illyustrator, yozuvchi va jurnalist ham edi.
Oila a’zolari uning otasi izidan borib, o‘zini huquqshunoslik kasbiga bag‘ishlashini umid qilishgan, ammo u rassom bo‘lishni orzu qilardi. Kristian Krog ikkala chaqiriqni ham amalga oshirishga erishdi.
Kristianiyada (hozirgi Oslo) huquqshunoslik fakultetini tugatgach, tasviriy san’atni o‘rganish uchun Karsruedagi san’at akademiyasiga o‘qishga kirdi. Ko‘plab yosh norvegiyalik rassomlar ta’limni davom ettirish uchun Myunxenga yo‘l olganlarida, Krog ustozi Karl Gussov ortidan Berlinga bordi. Megapolis hayoti bilan to‘qnashuv unda o‘tkir ijtimoiy ongni uyg‘otdi, bu esa uning dolzarb ijtimoiy muammolarga qaratilgan butun keyingi ijodiy faoliyatini belgilab berdi.
Kristian Krog ijodi XIX asr oxiri va XX asr boshlaridagi badiiy oqimlarga sezilarli ta’sir ko‘rsatdi.
U insonparvar san’atkor sifatida o‘z asarlarida jamoatchilik e’tiborini qashshoqlik, ochlik, jinslar tengsizligi kabi o‘tkir ijtimoiy va axloqiy muammolarga qaratishga intildi.
Ellikka yaqin asarni o‘z ichiga olgan ko‘rgazmada tashrif buyuruvchilar rassomning fransuz ustalari – Gyustav Kurbe va Eduard Mane bilan tasviriy aloqalarini kuzatishlari mumkin.
Ekspozitsiya, shuningdek, “Bâbord” (1879) kartinasi bilan boshlangan dengizchilar portretlarining ta’sirchan turkumini o‘z ichiga oladi. Bu asar rassomning ijodiy tarjimai holida muhim ahamiyatga ega bo‘lib, uning ramkasida fotografiya san’atidan ilhomlanganlik sezilib turadi.
Kristian Krogning kundalik hayotni realistik tasvirlashdagi betakror iste’dodi uning turli oilaviy portretlarni aks ettiruvchi rasmlarida namoyon bo‘lgan.
“Kristian Krog. Shimol odamlari” ko‘rgazmasi rassomchilik, xususan, naturalizm va impressionizm yo‘nalishlari, shuningdek, Skandinaviya san’atiga qiziquvchilar uchun haqiqiy voqeaga aylanadi.
Ko‘rgazmaga 2025-yil 27-iyulgacha tashrif buyurish mumkin.
