Qahvaxonalar: tarix va san’at uchrashgan maskan
Har bir buyumi tarix so‘zlaydigan interyerga ega dunyoning bejirim va asl qahvaxonalari bo‘ylab sayoh
Qahvaxonalar – bu shunchaki qahva ichiladigan joy emas, balki tarix jonlanadigan va interyeri – menyusi kabi muhim ahamiyatga ega bo‘lgan go‘shalardir. Bu qahvaxonalarning har birida nafaqat ta’mning nozik jihatlari, balki sizni boshqa davrga olib borib qo‘yadigan me’moriy durdonalarni ham topish mumkin. Sizni dunyoning nafis qahvaxonalari bo‘ylab sayohatga taklif etamiz – Parij vokzalidan tortib to Nyu-York qalbidagi Angliyaning shinam burchagigacha.
Le Train Bleu, Parij
Garde-Lion vokzalida joylashgan Le Train Bleu restorani nafaqat o‘zining gastronomik durdonalari, balki ajoyib interyeri bilan ham e’tiborni tortadi.
Belle Époque uslubida bunyod etilgan bu inshoot XX asr boshlaridagi hashamat va ulug‘vorlikni yodga soladi. O‘sha davrda temir yo‘l sayohatlari oddiy harakatlanishdan ko‘ra ko‘proq ma’no kasb etgan. Bu yerda baland shiftlar, ulkan qandillar hamda zarhal bezaklar arkalar va vitrajlar bilan uyg‘unlashib, poyezd safarlari romantika va nafosatning timsoli bo‘lgan paytdagi muhitni yaratadi.
Bosh oshpaz Mishel Rostang bilan hamkorlikda ishlab chiqilgan taomlar ro‘yxati fransuz oshpazlik san’atini aks ettiradi. Har bir element vokzallar o‘rganilmagan manzillar va madaniyatlar olamining darvozasi bo‘lgan davrni eslatib turadi.
Tea & Sympathy, Nyu-York
1990-yildan beri kichik Tea & Sympathy Britaniya qahvaxonasi Nyu-Yorkka Angliyaning bir bo‘lakchasini hadya etib kelmoqda.
Bu joy tashrif buyuruvchilarni iliqlik va shinamligi bilan chulg‘ab oladi, go‘yoki buvilar va bobolarning gulqog‘ozli devorlari va tokchalaridagi antiqa idish-tovoqlari bilan bezatilgan uylarini eslatib yuboradi. Interyer go‘yo bizni o‘tmishga qaytarish uchun yaratilgandek: eski fotosuratlar, rasmlar va turli xil mayda-chuyda buyumlar nostalgiya va shinamlik muhitini yaratadi.
Interyer uslubiga mos ravishda tayyorlangan menyu o‘zining mazasi va iliq xotiralar bilan ko‘ngilni yoritadigan oddiy «qulay taomlar»ni taklif etadi. Eski uslubdagi katta likoplardagi mo‘l-ko‘l porsiyalar esa uyda mehmondo‘stlik qilinayotgandek tuyg‘uni yanada kuchaytiradi.
New York Café, Budapesht
1894-yilda Budapeshtda ochilgan New York Café – bu nafaqat qahvaxona, balki haqiqiy madaniy diqqatga sazovor joy hisoblanadi.
Yirik ustunlar, zarhal va billur qandillar bilan bezalgan italyan Uyg‘onish davri uslubidagi interyer saroyning hashamatli muhitiga singib ketadi. Devorlar mifologik va tarixiy syujetlarni aks ettiruvchi freskalar va suratlar bilan bezatilgan bo‘lib, interyerning o‘zi mahobatli opera zalini eslatadi. Tashrif buyuruvchilar o‘zlarini bu yerda bir asrdan ko‘proq vaqt oldin gullab-yashnagan shahar madaniy hayotining bir qismi sifatida his qilishadi.
Caffé Florian, Venetsiya
Venetsiyadagi Caffé Florian – 1720-yilda tashkil etilgan Yevropaning eng qadimgi qahvaxonalaridan biri bo‘lib, barokko va rokokoning haqiqiy timsoli hisoblanadi. Boy freskalar va dekorativ naqshlar bilan bezatilgan keng zallar vaqt bo‘ylab qilingan sayohat taassurotini yaratadi. Qahvaxonaning har bir zalida turli davr va madaniyatlar aks ettirilgan: Senatorlar zalidan Sharq zaligacha.
Bu yerda nafis desertlar va italyan choyi orasida o‘tmishning nafasini his qilish va suvda shahar tarixi bilan yuzlashish mumkin.
Ushbu qahvaxonalarning har biri shunchaki dam olish maskani emas, balki san’at va tarix birlashib, unutib bo‘lmaydigan muhitni yaratadigan noyob makondir. Ularning menyulari mazasini tatib ko‘ring, o‘sha davr ruhini his eting va ushbu qiziqarli sayohatning bir qismiga aylaning.
