Selin Dion: olqishlarga munosib chiqish
Ayrim liboslar sahnaga yana bir bor chiqishga arziydi. Hatto birinchi va ikkinchi chiqish orasidan qariyb o‘ttiz yil o‘tgan bo‘lsa ham.
14-oktabr kuni Parijdagi konsertida Selin Dion Chanel libosida namoyon bo‘ldi. Uning 1997-yilgi «Oskar» marosimidagi obrazini eslaganlar, albatta, dejavyuni his qilgan bo‘lsa kerak. To‘q ko‘kka singib boruvchi kumush tus, sochilgan jilvalar, o‘mrov suyagi yonidagi kometa. O‘shanda ko‘ylakni Karl Lagerfeld yaratgan edi. Endi esa Matye Blazi bu hikoyaga qaytdi.
Blazi tanish yorug‘lik o‘yinini saqlab qoldi, biroq siluetni o‘zgartirdi: korsetli yuqori qism, ochiq yelkalar, bo‘rttirilgan bo‘ksa chizig‘i va baland kesim. Ko‘ylakning yuqori qismidagi kashta shu qadar zichki, u deyarli metallga o‘xshaydi. Etakka yaqinlashgan sari kumush tus asta-sekin tungi ko‘kka singib ketadi. Har bir burilish jilvalar naqshini o‘zgartiradigan harakat paytida bu ayniqsa go‘zal ko‘rinadi.
Bu yengillik ortida Chanel’ning Parijdagi atelyelarida sarflangan 1 380 soatdan ortiq mehnat, 6 000 ta yaltiroq bezak va 5 000 ta munchoq turibdi. Obrazni 1 080 ta olmos bilan bezatilgan Comète kolyesining yangi talqini yakunlaydi — bu ham 1997-yildagi o‘sha chiqishga yana bir ishora.
Ammo bu hikoyaning eng go‘zal jihati ikki suratni yonma-yon qo‘yganda ochiladi. Birida Selin qizil yo‘lakda fotosuratchilarga tabassum qilmoqda. Ikkinchisida esa qo‘lida mikrofon bilan tomoshabinlar qarshisida turibdi. Ularning orasida qariyb o‘ttiz yil bor, ammo hashamatli libosda namoyon bo‘lish zavqi hamon o‘sha-o‘sha.
Shunda ortga varaqlagingiz keladi. Har ikki ko‘ylakni yaqindan tomosha qilgingiz. So‘ng esa Selin qo‘shiqlarini tinglagingiz.