WHITE Milano moda chegaralarini kengaytirmoqda
An’anaviy ko‘rgazma formatini qayta talqin qilgan WHITE Milano 450 ta brendni birlashtirib, xalqaro hamkorlik uchun yangi imkoniyatlar ochmoqda
Bu kuzda Milanning Via Tortona ko‘chasi ulkan ochiq osmon ostidagi ko‘rgazmani eslatdi: odatiy stendlar o‘rnini butun binolar va mahallalar egalladi. Ilgari asosan moda industriyasi mutaxassislariga mo‘ljallangan tadbir bu safar keng jamoatchilik uchun ham ochildi va 24–27-sentabr kunlari bo‘lib o‘tdi. Tashkilotchilarning ta’kidlashicha, B2B va B2C formatlarini birlashtirgan yondashuv hududga minglab tashrif buyuruvchilarni jalb qildi va o‘z samarasini ko‘rsatdi.
Ko‘rgazma ko‘lami raqamlarda ham yaqqol namoyon bo‘ladi. Ishtirokchi brendlar soni 450 taga yetdi — bu 2025-yil kuzidagi ko‘rsatkichdan 24 foizga ko‘p. Bayyerlar va moda industriyasining boshqa mutaxassislari soni esa qariyb 9 ming kishini tashkil etdi. Ikki yangi manzil ko‘rgazma maydonini kengaytirdi: T31 hududida lifestyle, aksessuarlar va go‘zallik yo‘nalishidagi loyihalar, T35 maydonida esa resortwear kolleksiyalari namoyish etildi. Ularga aksessuarlar taqdim etilgan Nuvola zonasi hamda streetwear, shahar uslubi va denimga bag‘ishlangan Box maydoni qo‘shildi. Italiyalik bayyerlar soni 10 foizga oshdi, xalqaro mutaxassislar orasidagi o‘sish esa yanada sezilarli bo‘ldi.
Photo: PR White Milano
Bu mavsumning faxriy mehmoni eksperimental bichim va tikuv uslubi bilan tanilgan koreyalik KIMHĒKIM brendi bo‘ldi. Shuningdek, Ibeliv’ning rafiyadan tayyorlangan sumkalari, Serbiyaning Batakovic Belgrade brendi, deyarli haykaltaroshlik asarlarini eslatuvchi DUHA poyabzallari hamda Karib dengizi va O‘rta yer dengizi estetikalarini uyg‘unlashtirgan Donde Esteban’ning ta’til ruhidagi printlari e’tiborni tortdi. Vlisco’ning to‘qimachilik namunalari, Alessandro Enriquez’ning quvnoq ijodiy olami, Les Ottomans, Qeeboo va Poltronova’ning dizayn loyihalari ham alohida ajralib turdi. Braziliyaning Granado parfyumeriya uyi esa dasturga o‘ziga xos xushbo‘y ohang bag‘ishladi.
Armaniston, Braziliya, Ispaniya, Kanar orollari, Ruminiya, Hindiston va Kolumbiyadan kelgan delegatsiyalar ko‘rgazmaning xalqaro qamrovini yanada kengaytirdi. Shu tariqa WHITE Milano tobora «Made in Italy» an’analari va boshqa mamlakatlarning ijodiy sahnalari o‘rtasidagi ko‘prikka aylanmoqda.
Ko‘rgazma asoschisi Massimiliano Bizzining fikricha, yoshlar energiyasining hududga qaytishi yangi format o‘z auditoriyasini topganini tasdiqlaydi. Vitse-prezident Monica Sarti ham ushbu mavsumning o‘ziga xos sur’ati va xalqaro mehmonlar sonining sezilarli darajada oshganini ta’kidlaydi.
Photo: PR White Milano
WHITE Milano ko‘rgazmasining navbatdagi mavsumi 2027-yil 25–28-fevral kunlari bo‘lib o‘tadi.
